PA RAEOA enkoraja membru PSHT promove dame
OÉ-CUSSE, 27 agostu 2022 (TATOLI)– Prezidente Autoridade Rejiaun Administrativa Espesiál Oé-Cusse no Ambeno (RAEOA), Arsénio Paixão Bano, enkoraja membru organizasaun Perguruan Setia Hati Terate (PSHT) atu hatudu dixipliña, promove dame ho sentidu nasionalizmu hodi kontribui ba prosesu dezenvolvimentu iha Timor-Leste, espesiélmente iha Oé-Cusse.
“Ha’u fiar alin sira sei iha influénsia iha ba RAEOA, bainhira imi hotu iha influénsia di’ak tanba ita-nia rai ne’e persiza ema dixipliña. Tanba treinadu ona iha organizasaun nia laran, ita persiza alin sira hatene respeita ema seluk, nune’e hotu-hotu kontribui ba dame iha Oé-Cusse,” katak Arsénio Bano, iha seremónia agradesimentu ba membru foun PSHT na’in-83 iha aldeia Oésono, suku Costa, Oé-Cusse, Sábadu ne’e.
Arsénio Bano mós husu juventude atoni-oan tenke hametin unidade, maske envolve iha organizasaun arte marsiál oin-oin.
“Imi hotu tenke hatudu ita-nia rai ne’e diferénsia, PSHT tenke iha influénsia di’ak ba joven sira seluk, no PSHT tenke hatoman-án servisu solidariedade, halo relasaun di’ak ho organizasaun sira seluk sai ezemplu iha Oé-Cusse, tenke tane aas dixipliña,” katak
Iha fatin hanesan, Reprezentante Prezidente sub-Komisaun Reguladóra Arte Masiál (KRAM) RAEOA, Juvinál da Cruz Salu, husu membru organizasaun PSHT kumpre rekezitu rezolusaun Governu no lei n’umeru 5/2017, hodi kumpre tuir doutrina ne’e prevista ona iha estatutu organizasaun nian.
“Ha’u orgullu tanba juventude iha Oé-Cusse, kuda metin moto Atoni-oan nian, katak unidade asaun progresu, hamutuk servisu hodi dezenvolve Timor-Leste, no espesiál iha Oé-Cusse Ambeno,” nia afirma.
Nune’e, nia apela nafatin ba Grupu Arte Marsiál-sira iha RAEOA, kontinua promove dame, pás no estabilidade.
Entretantu, Koordenadór Organizasaun PSHT Oé-Cusse, Candido Dos Reis Amarál, agradese ba servisu sub-KRAM RAEOA, tanba durante ne’e fasilita morál, hodi re-integra hikas PSHT liuliu realiza graduasaun sa’e sintu iha rai laran.
“Ohin, Prezidente Autoridade, KRAM, PNTL no Igreja Katólika inklui maluk organizasaun sira seluk, mai asiste seremónia agradesimentu ba kandidatu sira hamutuk 83, tanba foin daudaun simu ona graduasaun sa’e sintu iha Díli, ne’e atu hatudu katak PSHT prontu atu servisu ho ema hotu ho orgaun Estadu atu kontribuisaun ba pás no dame,” nia orgullu.
Nu’udar responsabél másimu iha organizasuan PSHT sente orgullu no agradese ba Governu Timor-Leste liuhosi Sekretáriadu Estadu Juventude no Desportu (SEJD) tanba ho vontade tomak bele organiza eventu sa’e sintu iha rai laran, kompara ho tinan hirak kotuk, ne’ebé balun hakat dalan ilegál tuir graduasaun iha rai liur.
Nia informa, membru PSHT dadaun ne’e eziste permanente iha RAEOA hamutuk na’in-300 no prátikamente hamutuk na’in-600.
IKS-KORKA kongratula PSHT Oé-Cusse
Organizasaun arte marsiál hosi Ikatan Kera Silat (IKS), no Kmanek Oan Rai- Klaran (KORKA), hato’o parabéns ba membru foun na’in-83 ne’ebé simu ona graduasaun hodi sai família bo’ot iha organizasaun Persaudaran Setia Hati Terrate (PSHT) iha Rejiaun Administrativa Espesiál Oé-Cusse no Ambeno (RAEOA).
Reprezenta Organizasaun Ikatan Kera Silat (IKS), Lamberto Salu, orgullu no hato’o parabéns ba organizasaun PSHT ne’ebé mak organizadu tebes, nune’e bele priense rekezitu tomak ne’ebé propoin hosi Governu Timor-Leste liuhosi KRAM, nune’e maka konsege realiza graduasaun sa’e sintu iha rai laran.
“Ami hosi IKS hakarak hato’o parabéns ba estrutura PSHT hosi nasionál to’o rejiaun, ne’ebé mak organiza eventu sa’e sintu iha rai laran. Ami mós hakarak hato’o parabéns ba membru foun na’in-83 tanba sai ona família bo’ot iha organizasuan PSHT,” katak nian.
Nune’e, nia espera membru PSHT nafatin kria amizade ho maluk arte marsiál sira seluk, hodi banati tuir doutrina organizasaun no hakruk ba Lei Estadu Timor-Leste nian, hodi garante pás no estabilidade iha Oé-Cusse.
Entretantu, Reprezentante KORKA, Fernando Tefa, hato’o parabéns ba Governu Timor-Leste, tanba tinan ne’e reativa ona organizasaun PSHT realiza seremónia graduasaun iha rai laran.
“Ami hakarak agradese ba VIII Governu tanba realiza ona organizasaun PSHT, tan ne’e ami hakarak fó parabéns ba maluk graduadu sira, ami hosi KORKA hakarak ita hotu kria dame no pás hodi kontribui ba prosesu dezenvolvimentu liuliu ita-nia rai Oé-Cusse, no mós kuidadu no tane aas ita-nia doutrina organizasaun hodi respeita sosiedade,” nia orgullu.
Iha 26 abríl 2022, Governu liuhosi Sekretária Estadu Juventude no Desportu (SEJD), aprova ona legalidade ba arte marsiál tolu, IKS, PSHT no KORKA no públika ona iha Jornál Repúblika hodi bele halo treinu livre no sa’e sintu iha rai-laran.
Bazeia rezolusaun Governu númeru 14/2020, 2 marsu, ne’ebé revoga tiha rezolusaun númeru 16/2013 hodi fó informasaun ba Grupu Arte Marsiál tolu ne’e, persiza kumpre kritériu ne’ebé rejista hamutuk pontu 18.
Nune’e, iha 31 jullu 2021, organizasaun PSHT kompleta ona rekezitu hosi Komisaun Reguladóra Arte Marsiál, no rejistu ona iha Ministériu Justisa (MJ) liuhosi Diresaun Nasionál Notariadu, no iha direitu absolutamente hodi hala’o atividade legál iha Timor-Leste.
Tuir dadus ne’ebé sub-KRAM Oé-Cusse rejista, iha Oé-cusse rejista organizasaun hitu maka eziste iha Oé-Cusse ho totál membru hamutuk 1.800-resin, hanesan PSHT, IKS, PD, KORKA, Taekwondo, Karatedo no Boxing.
Notísia relevante: KRAM Oé-Cusse dezloka kandidatu PSHT na’in-83 tuir graduasaun iha Dili
Jornalista: Abílio Elo Nini
Editór: Florencio Miranda Ximenes
