DAS Bobonaro garante karreta funeráriu tolu sufisiente tula mate-isin
BOBONARO, 01 outubru 2022 (TATOLI)-Diretora Asaun Sosiál (DAS) munisípiu Bobonaro, Eurosia Sarmento, garante karreta funeráriu tolu sei sufisiente halo operasaun tula mate-isin ba postu administrativu neen iha munisípiu ne’e.
Nia haktuir, diresaun ne’e estabelese tinan hirak liubá iha de’it krreta funeráriu rua ne’ebé dada hosi sentru solidariedade sosiál munisípiu Bobonaro, ida ho kondisaun normál hela no ida seluk mak oras ne’e avaria hela.
Enkuantu iha tinan 2021 konsege sosa tán karreta funeráriu ida no iha tinan ne’e aumenta tán orsamentu rihun $40 no daudaun iha ona faze rodajen.
Notísia relevante: DAS Bobonaro distribui ona kaixaun 80 ba postu administrativu haat
“Ho aumenta karreta foun sufisiente hela, tanba antes ne’e ita iha rua de’it mós bele halo operasaun ba postu administrativu neen, ita atu dehan de’it katak ema mate ne’e la’ós loron-loron ida,” nia informa ba jornalista sira, iha administrasaun munisípiu Bobonaro, kinta ne’e.
Daudaun ne’e karreta funeráriu iha DAS Bobonaro hamutuk tolu no ida-ne’ebé avaria hela tuir informasaun katak sei entrega ba Ministériu Finansa mak halo manutensaun.
Kona-bá karreta foun ne’ebé sei halo rodajen ba ninia kilómetru bainhira konklui temporariamente sei asegura hela, só bele halo operasaun prioridade liu ba ema importante sira de’it.
“Karik ema sira hanesan Verry Important Persons (VIP), veteranu sira no eis titulár sira mak buat ruma karik ita utiliza mak karreta foun ne’e,” nia hateten.
Hafoin de estabelese diresaun ne’e ekipa sira sosializa ba postu administrativu Atabae, Balibo, Cailaco, Maliana, Bobonaro no Lolotoe, hodi habelar servisu DAS nian, nune’e bainhira akontese família ruma mate komunidade sira labele ba husu apoia fali karreta iha sentru solidaridade sosiál no inkluzaun, ne’ebé lokaliza iha bairru Muguis, suku Raifun, Maliana.
Notísia relevante: DAS Bobonaro sei apoia umanitária ba família vulnerável
Jornalista : Sérgio da Cruz
Editór : Evaristo Soares Martins
