iklan

NASIONÁL, DESPORTU, HEADLINE

FFTL rekoñese Fabio la simu saláriu durante fulan-lima

FFTL rekoñese Fabio la simu saláriu durante fulan-lima

Adjuntu Sekertáriu Jerál Federasaun Futeból Timor-Leste (FFTL), Frederico Martins. Imajen Tatoli/Francisco Sony

DILI, 02 setembru 2022 (TATOLI)– Federasaun Futeból Timor-Leste (FFTL), liuhosi Adjuntu Sekretáriu Jerál, Frederico Martins, rekoñese durante fulan-lima, Treinadór Prinsipál Selesaun Nasionál Under 23 (U-23), Fabio Maciel da Silva,la simu saláriu.

“Klarifika de’it kontratu ne’ebé mak selebra entre treinadór Fabio ne’e tanba kooperasaun entre FFTL ho Asian Football Confederation (AFC), loos duni durante fulan-lima, hahú hosi abríl to’o agostu nia-seidauk simu saláriu,” dehan Adjuntu Sekretáriu Jerál FFTL ne’e ba Jornalista-sira iha edifisiu FFTL-Dili, sesta ne’e.

Notísia relevante: La simu saláriu, Fabio rejigna-aan hosi Treinadór futeból selesaun nasionál

Nia esplika, treinadór ne’e seidauk simu saláriu tanba iha implikasaun hosi mudansa apoia finanseiru hosi AFC, nune’e implika pagamentu salariál ba treinadór sira nian, la’ós de’it Fabio, maibé iha mós treinadór na’in-tolu iha FFTL.

Treinadór Fabio Maciel da Silva, Imajen/Hortecio Sanchez

Loloos kontratu ba Fabio ramata ona, bainhira jogu SEA Games termina, maibé tanba abríl ho maiu seidauk selu, nune’e FFTL  deside hodi extende nia-kontratu to’o 31 dezembru 2022.

“Ami halo esforsu hotu hodi selu nia,  iha janeiru to’o marsu, maibé abril to’o agora, sei iha prosesu nia laran tanba AFC foin hasai regulamentu jerál kona-ba aplikasaun apoia finanseiru ne’e iha juñu, entaun ami aplika ba fundu ne’e, nune’e iha 30 agostu foin lalais mak AFC foin halo aprovasaun finanseiru ba aplikasaun saláriu, nune’e la’ós dehan la selu, maibé ita sei selu,” Frederico kompromete.

Frederico Martins, akresenta bainhira AFC aprova orsamentu no halo transferénsia mak iha tempu besik, FFTL halo pagamentu ba nia saláriu durante fulan-lima nian.

“Ami komunika ona ho nia mentor rasik hatete labele foti kestaun ne’e tuir dalan legál tanba prosesu hirak ne’e FIFA hatene hahú kedan iha abríl sira la simu saláriu.  Ami hato’o kedan ba FIFA. Nia (Fabio) hakarak lori ba dalan legál ka keixa ba FIFA, FFTL prontu atu hatan.  Maibé atu termina nia kontratu FFTL lakoi selu nia saláriu to’o dezembru tanba laiha servisu ida ba nia halo,” nia afirma.

Kona-ba rejigna-aan, nia dehan treinadór Fabio informa ona, maibé desizaun ne’ebé treinadór foti unilateralmente tanba FFTL seidauk foti desizaun hodi hapara nia.

“Fabio ho emosaun oituan tanba fulan lima la simu saláriu ne’e, horisehik nia deside termina kontratu unilateralmente, katak termina kontratu hosi nia parte de’it. Tanba ami seidauk fó notifikasaun ida ba nia hodi termina nia kontratu, ida ne’e direitu ninian no FFTL sei la halo intervensaun,” katak ezekutivu ne’e.

Maibé, Fabio nia kontratu ho FFTL seidauk ramata labele halo kontratu fali ho klube seluk, tanba tuir informasaun klube barak iha Ázia hahú hakbesik-aan ba nia.

Tanba ne’e, FFTL sei negosia fila-fali ho treinadór ne’e atu kaer nafatin selesaun nasionál U-23 tanba jogu Mitsubishi sei hahú iha novermbru tinan ne’e.

“Nia kontratu sei naruk hela, bainhira selu tiha saláriu fulan-lima ne’e, ita haree oinsa nia bele ka’er nafatin ita nia selesaun, tanba jogu Mitsubishi ASEAN Football Federation (AFF) ita presiza treinadór. Maibé nia lakohi ona mak ita sei buka fali treinadór foun hodi substitui nia-fatin,” nia haklaken.

Jornalista: Hortencio Sanchez

Editór      : Florencio Miranda Ximenes

iklan
iklan

Leave a Reply

iklan
error: Content is protected !!