Governu presiza harii Banku Água tolu iha Bobonaro
BOBONARO, 02 setembru 2022 (TATOLI) – Diretór munisipál agrikultura Bobonaro, Alberto Gomes Lopes, hateten Governu presiza harii Banku Água hamutuk tolu iha munisípiu Bobonaro, bodi hasa’e produsaun agríkola.
Notísia relevante: MAP kee ona kanál irrigasaun tradisionál iha Tapo-Memo
“Ita Bobonaro merese atu konstrui Banku de Água tolu,bida iha Maliana II, ida fali iha Cailaco no ida hatutan iha Maliana I tún ba iha Ute-Dai kraik, ami nia pedidu tau ona, depende ba ema boot sira atu konsidera ka lae,” nia informa ba Jornalista sira iha Administrasaun Maliana.
Alberto subliña, konstrusaun banku água tolu ne’e hanesan planu mestre diresaun munisipál servisu agrikultura nian ne’ebé elabora hamutuk hafoin sosializa hosi Vise Primeiru Ministru no Ministru Planu no Ordenamentu, José María dos Reis, katak munisípiu Bobonaro tama iha pilotu ida atu dezenvolve iha área hotu-hotu, liuliu setór agrikultura
Nia dehan, iha nesesidade duni atu konstrui banku água nune’e bele fornese bee ba agrikultór sira-nia natar hodi hasa’e produsaun agríkola.
“Ida-ne’e nesesidade ezije ita atu konstrui duni, tanba ita halo irrigasaun bee la la’o, ne’e mak loron kona ita sempre hateten irrigasaun aat,” nia eskkarese.
Reponsável másimu diresaun munisipál servisu agrikultura ne’e iha esperansa katak bainhira governu tau prioridade atu implementa banku águagua tolu ne’e ba futuru sei fó vantajen di’ak ba natar sira no to’os.
“Ne’e sei bele fornese bee ba hotu, agora fila-fali ba komunidade agrikultór idak-idak iha vontade atu halo ka lae, depois estadu ka governu fó kondisaun di’ak ona, bee sufisiente no irrigasaun di’ak,” nia dehan.
Purtantu tuir dadus sensu agríkola munisípiu Bobonaro iha poténsia ba setór agrikultura área kultiva natar maizumenus ektare 7,663.
Tuir dadus CVRS períodu II (1 julu to’o 31 dezembru 2018) Diresaun Estatístika munisípiu Bobonaro iha aldeia 192, suku 50, postu administrativu neen, ho totál populasaun 114,537 komposta hosi mane 57,462, feto 57,075 ho totál uma-kain 24,591
Notísia relevante: Komunidade Maliana Halerik Kondisaun Estrada-Irrigasaun
Jornalista: Sérgio da Cruz
Editór: Evaristo Soares Martins
