Ekipa konjunta kontinua halo investigasaun ba kazu joven ida mate iha sela
DILI, 04 setembru 2022 (TATOLI)—Portavós Komandu Jerál Polísia Nasionál Timor-Leste (PNTL), Superentidente Xefe Armando Monteiro, hateten daudaun ne’e ekipa konjunta kontinua halo investigasaun hodi rekolla informsaun no evidensia sira ba kazu sidadaun ne’ebé mate ho kondisaun fiu eletrisidade iha kakorok, iha sela detensaun Kaikoli, Komandu PNTL munisípiu Dili.
Notísia Relevante: Ekipa konjunta hahú rekolla evidénsia ba kazu tara-aan iha sela detensaun polísia
Ekipa konjunta ne’e kompostu hosi Ministeriu Públiku (MP), Defensória Públika (DP) Prvedória Direitu Umanu Justisa (PDHJ, sigla portugés), Polísia Nasionál Servisu Investigasaun Kriminál (PNSIK) no parte Investigasaun Kriminál Munisípiu Dili kontinua halo investigasaun hodi rekolla informasaun no evidensia sira ba kazu joven ne’ebé mate ho fiu eletrisidade iha kakorok.
“Ekipa konjunta ne’ebé forma hosi Komandu Jerál PNTL dezde horisehik to’o ohin kotinua halo investigasaun,” Portavós Komandu Jerál Polisia Nasionál Timor-Leste (PNTL) ne’e hateten ba Agência Tatoli, liuhosi telefônika, domingu ne’e.
Rezultadu hosi investigasaun ne’e sei submete ba Komandu Jerál Polisia Timor-Leste hodi bele tetu no sei foti desizaun.
“Ekipa ne’e nia rezultadu investigasaun mak sei submete ba Komandu Jerál atu foti dezaun. Karik hosi rezultadu investigasaun ne’e mak hatudu membru PNTL mak komete duni, Komandu Jerál sei foti desizaun disiplina ka demite ne’e depende ba rezultadu investigasaun ne’e hatudu,” Komandante Armando Monteiro informa.
Tanba ne’e, Portavós Komandu Jerál PNTL ne’e husu ba públiku kontinua pasiénsia hodi hein ekipa konjunta ne’e nia serbisu, no tempu badak nia laran rezultadu ne’e sei fó sai ba públiku.
Notísia Relevante: Rejeita mate tanba tara-aan, família matebian husu PNTL fó sai rezultadu autópsia
Jornalista : Natalino Costa
Editór : Cancio Ximenes
