iklan

DILI

PR Horta lori Estadu kongratula Don Virgílio Kardeál

PR Horta lori Estadu kongratula Don Virgílio Kardeál

Don Virgílio Kardeál do Carmo da Silva, SDB. Imajen Tatoli/António Daciparu.

DILI, 05 setembru 2022 (TATOLI)—Prezidente Repúblika (PR), José Ramos Horta, lori Estadu nia naran kongratula Don Virgílio Kardeál do Carmo da Silva, SDB, iha katedrál Dili.

Notísia Relevante: Kardeál Timor-Leste lori Estadu nia kualidade iha internasionál no Vatikanu

Prezidente Repúblika, José Ramos-Horta. Imajen Tatoli/Francisco Sony

“Kadetrál ida-ne’e ohin sai tan fatin ne’ebé monumentál tebes mai igreja katólika iha rai doben Timor-Leste maibé mós ba nasaun Timor tomak. Tan ne’e, lori Estadu tomak nia naran nu’udar Xefe Estadu ha’u hakarak hato’o ami tomak nia saudasaun ba Sua Eminénsia Don Virgílio Kardeál no kongratula ba ita-boot ne’ebé tama ona iha koléjiu kardealisa,’’ Xefe Estadu hato’o iha nia diskursu iha igreja Katedral, Dili, segunda ne’e.

Xefe Estadu hatten, Don Virgílio Kardeál rasik halo deklarasaun iha mídia katak hatais tupura no simu direta kardialisa ida la’ós sinál ba rejime karreira ida maibé previléjiu ne’ebé igreja universál hara’ik mai igreja partikulár ba Timor-Leste no títulu Kardeál ida-ne’e hanesan méritu ba sarani katólika no povu Timor-Leste nian.

“Igreja Kadetrál ida-ne’e agora sai ona hanesan monumentu boot tebe-tebes ba mundu bainhira tama iha uma kreda boot ida-ne’e. Iha portaun ida haree asinatura rua ida hosi jenerál Muhamad Soeharto, Prezidente Repúblika Indonézia nian no nu’udar figura Musulmanu ida-ne’ebé inaugura projetu konstrusaun iha 12 novembru 1978 ida seluk asinatura hosi lidér espirituál no karismátiku katóliku Papa João Paulo II agora Santu iha 12 outubru 1989,” Horta hateten.

Laureadu Nobel da Páz ne’e hateten, laiha tan katedrál ruma iha mundu ne’e mak konserva plaka monumentál hanesan ida-ne’e, iha kadetrál ida ne’e liu tiha tinan 450 evanjelizasaun mai iha rai ida-ne’e.

“Ha’u sente onradu nu’udar Laureadu Prémiu Nobel da Paz. Tuir mai iha 1996 Papa Santu João Paulo II harii dioseze Baucau no foti padre Basílio do Nacimento sai nu’udar primeiru Bispu, tuir mai Papa foti Bispu Don Norberto hodi ukun dioseze Maliana foun ida-ne’e,” nia dehan.

Horta haktuir, só iha de’it momentu seluk komparavel mak Santu Padre Francisco ho Grand Iman asina dokumentu kona-ba fraternidade umana iha Abudabi 04 fevereiru 2019, lidér katóliku ida ho lidér Islam ba dokumentu ida ba mundu tomak.

Nune’e, aproveita ida-ne’e hakarak hato’o felisitasaun hosi komite fraternidade umana iha Abudabi liu-liu hosi Sekretáriu Jerál no sira dejeza atu Timor-Leste sai ezemplu Estadu dahuluk no relijaun dahuluk hosi katólika ne’ebé halo adezaun halo promosaun ba fraternidade umana.

“Tan ne’e nu’udar promotor ba fraternidade umana hamutuk ho Parlamentu Nasionál no Governu no nu’udar Prezidente Repúblika, ha’u sente haksolok boot tan hetan forsa ispirituál moral no intelektuál liuhosi kardeál ida hamutuk ho Bispu Maliana no ita hotu hein tan Bispu hosi dioseze Baucau nian, atu hamutuk halo promosaun fraternidade umana ba pás mundiál no konvivensia komun,” nia dehan.

Don Virgílio Kardeál do Carmo da Silva, SDB, fó bensaun ba sarani sira-ne’ebé forma no hein iha rotunda Nicolau Lobato, Comoro, Dili. Imajen Tatoli/António Daciparu.

Bainhira nia-parte ba vizita Jakarta-Indonézia fulan hirak liubá, hodi hasoru malu mós ho lidér Islámika Indonézia no nia dehan bebe’ik no deklarasaun hosi Eminénsia rasik katak Timor-Leste tenke sai fatin ne’ebé matak malirin no loké liman ba malu hodi simu malu trankuilu no tolerante.

“Sua eminénsia reverendisima, ita-boot simu direta hosi Papa Francisco nia liman, Santu Padre ida-ne’e hakarak atu igreja na perifeira do mundo hetan voz iha kuria Romana nia laran maibé liu-liu atu sai a voz profetika hamutuk ho relijiaun sira seluk hodi promove bens estár, materiál, espirituál no sidadaun Timor-Leste hanesan konstituisaun rasik hatuur ona dehan atu halo dezenvolvimentu sosiedade ida solidáriu no fraternal,” nia hateten.

Timor-Leste iha pozisaun tomak sempre ki’ik no mukit maibé simbolikamete TL nia kardinalismu lori revolusaun da ternura, espresaun ne’ebé Papa Francisco hato’o ba igreja universál katak revolusaun da ternua katak igreja la’ós de’it hateke ba lalehan maibé hananu gloria Maromak nian iha leten aas ba maibé mós igreja ida-ne’ebé hamrik metin iha rai hodi luta ba justisa no pás.

Eminénsia Don Virgílio Kardeál do Carmo, segunda ne’e (05/09), iha tuku 06h30, to’o fali ona Timor-Leste ne’ebé simu líder hosi órgaun soberania haat, padre-madre, no sarani lubun wa’in ne’ebé hein iha Aeroportu Internasionál Prezidente Nicolau Lobato, Comoro, Dili.

Tuir oráriu, eminénsia Don Virgílio Kardeál simu hosi grupu kulturál hosi Suku Nahareka-Ossu-Viqueque, no halo kedas konferénsia imprensa iha sala Verry Important Person (VIP), iha aeroportu internasionál Comoro.

“Agradese ba timoroan tomak, sarani tomak, ba ita-boot sira-nia domin, ita-boot sira nia ksolok, hatudu ba malu iha loron hirak ne’e nia laran. Domin ksolok ne’e ha’u simu maibé ha’u mós partilla fila-fali agradese ba imi tanba imi manifesta tuir dalan oioin, durante loron hirak ne’e nia laran no ita kontinua nafatin to’o aban. Partikularmente agradese ba Prezidente Repúblika maske labele partisipa iha Roma,” Don Virgílio Kardeál do Carmo da Silva, SDB, hato’o agradesimentu.

Hafoin ne’e, Don Virgílio Kardeál, ho prosisaun naruk ne’ebé sarani sira hosi areoportu intenasionál Comoro, akompañadu hosi membru Governu no parte igreja, hala’o posesaun naruk ba iha Igreja katedrál Maria Imaculada Conceição Vila Verde, Dili.

Sarani sira simu Don Virgílio Kardeál do Carmo da Silva, SDB, iha Katedrál Vila Verde, Dili, segunda (05/09). Imajen Tatoli/Francisco Sony.

Hosi rotunda Estátua Prezidente Nicolau Lobato, Comoro, Dili, sarani sira forma tutuir dalan, iha sira-nia liman kaer bandeira RDTL hodi foti sa’e bandeira ne’e hanesan tada fó bem-vindu ba Don Virgílio Kardeál hodi haklalak “Viva Don Bosco no viva amo kardeál”.

Koslok boot ba povu no sarani Timor-Leste, ferik-katuas, klosan eh labarik, rame-rame hakat sai no hamriik iha dalan ninin hodi haree Don Virgílio Kardeál nia prezensa, hodi hakilar no foti liman ksolok nian hodi simu kardeál dahuluk Timor-Leste nian.

Iha kareta laran, Don Virgílio Kardeál ho hamnasa mihis hodi foti liman-kuana hodi halo tada ‘krus’ iha anin letan, fó bensaun ba sarani sira-ne’ebé iha dalan ninin sira-ne’e ho Maromak nia grasa. Bensaun hosi kardeál ne’e, ba sarani sira tutuir dalan to’o tama igreja katedrál iha Vila Verde.

Iha igreja katedrál, Don Virgílio Kardeál sei hala’o tan bensaun ba sarani sira-ne’ebé marka prezensa no sei fó bensaun solene ba sarani sira-ne’ebé la konsege marka prezensa iha igreja katedrál.

Tuir planu, aban ( tersa, 06 agostu), Don Virgílio Kardeál sei preside misa solene hanesan misa agradesimentu ba kardeál foun ne’ebé sei selebra iha Tasi-Tolu, Dili, iha tuku 16h00 lorokraik.

Notísia Relevante: Kardeál Virgílio: “Ksolok ne’e la’ós ba ha’u maibé ba igreja no povu TL”

Jornalista : Nelson de Sousa

Editór       : Cancio Ximenes

iklan
iklan

Leave a Reply

iklan
error: Content is protected !!