iklan

NASIONÁL, HEADLINE, KAPITÁL

Sarani lubun entusiazmu partisipa misa agradesimentu no resesaun Kardeál iha Tasi-tolu

Sarani lubun entusiazmu partisipa misa agradesimentu no resesaun Kardeál iha Tasi-tolu

Sarani sira partisipa misa agradesimentu no resesaun ba Dom Virgílio Kardeál do Carmo da Silva, iha João Paulo II, Tasi-tolu, tersa (06/09). Imajen Tatoli/Francisco Sony

DILI, 06 setembru 2022 (TATOLI)–Sarani lubun hosi Dioseze Dili, Baucau no Maliana, daudaun ne’e entusiazmu maka’as hodi partisipa misa agradesimentu no resesaun ba Don Virgílio Kardeál do Carmo da Silva, iha João Paulo II, Tasi-tolu, ne’ebé hahú iha tuku 16:05 to’o ramata.

Sarani Parókia Dare hosi Dioseze Dili, Bernado Pereira Brito, sente kontente bele partisipa misa.

“Ha’u mai hosi Dare, hosi tuku 07:00 dadeer hodi mai akompaña ita-nia misa agradesimentu ne’e. Nu’udar sarani ha’u kontente tanba timor-oan hetan ona ita-nia bibi atan ida sai hanesan Jesus atubele komandu Rai doben Timor ne’ebé haree ba mai ita hetan ona ita-nia kardeál iha rai doben ne’e,” Bernardo Pereira hateten ba Agência Tatoli, iha Tasi-tolu, tersa ne’e.

Notísia relevante: Kongregasaun 56 sei partisipa iha misa agradesimentu kardeál foun

Iha fatin hanesan, Koordenadór Jerál Grupu Kárizmátiku Dioseze Maliana, Reinaldo de Jesus, hateten, preparasaun grupu karizmátiku Dioseze Maliana atu mai partisipa serimónia misa hahú bainhira rona informasaun no hosi ne’e fahe ba malu informasaun atubele partisipa.

“Horiseik ami mai meudia to’o horikalan iha ne’e no ita-nia sarani sai hosi Maliana ohin dadeer mak foin to’o mai no daudaun iha-ne’e hodi akompaña misa agradesimentu,” nia akresenta.

Tanba ne’e, hanesan sarani timor-oan nia sente orgullu tebes tanba tinan  barak nia laran bainhira Timor luta atu ukun-an, bele hetan naroman di’ak to’o bele hetan kardeál dahuluk iha Timor-Leste

“Hosi ne’e esperansa ba kardeál foun dahuluk iha uma-kreda Timor-Leste katak, ho kardeál dahuluk bele loke dalan no fó naroman ba sarani iha Timor-Leste atu fiar ne’e bele buras liután,” nia dehan.

Nune’e mós, Sarani Dioseze Baucau, Francisco Maia, sente kontente no agradese bele partisipa iha serimónia misa agradesimentu ne’e.

“Ita foin  primeiravez iha kardeál ida iha ita-nia rain, tanba kardeál ne’e lori grasa ida mai iha rai doben ne’e, no nune’e ita sarani bele iha fiar metin liután,” nia tenik.

Tuir observasaun jornalista Agência Tatoli iha terrenu, nota katak misa ne’e hetan partisipasaun másimu hosi kongregasaun no sarani tomak inklui seguransa másimu hosi Polísia Nasionál Timor-Leste (PNTL).

Jornalista   : Nelia Fernandes

Editora        : Julia Chatarina

iklan
iklan

Leave a Reply

iklan
error: Content is protected !!