DILI, 09 setembru 2022 (TATOLI)—Administradora postu administrativu Nain Feto, munisípiu Dili, Herminia Moniz, informa nia parte seidauk simu orientasaun hosi Autoridade Munisípiu Dili (AMD) atu kontrola motor sira-ne’ebé para iha jardin laran.
“Orientasaun kona-ba haree foer iha jardin Largo Lecidere ha’u simu ona maibé kona-ba atu kontrola motor para iha jardin laran, ha’u seidauk simu no ha’u mós seidauk komprende kona-ba motor para iha jardin Largo Lecidere nia laran ne’e, parte PNTL nian ka ita-nia seguransa na’in-neen nian. Tanba tuir ha’u-nia hatene sira na’in-ne’en nia kompiténsia mak haree ba foer no konflitu. Maibé, agora ha’u bele fó atensaun ba seguransa na’in-ne’en iha jardin Largo Lecidere atu fó atensaun ba sira-ne’ebé para motor arbiru iha jardin Largo nia laran, nune’e ba oin motor sira labele para tan iha jardin laran,” Herminia Moniz hateten ba Agência Tatoli iha nia kna’ar fatin Díli, sesta ne’e.
Tuir nia, pesoál seguransa na’in-nee’n mak fó seguransa iha jardin Largo Lecidere, tanba daudaun ne’e asina ona kontratu no simu ona orientasaun hosi Autoridade Munusípiu Dili, ne’ebé entrega mai iha postu administrativu Nain Feto atu iha fulan agostu ba oin, responsável halo movimentu ba jardin la’ós de’it Largo Lecidere, maibé hosi jardin Ponte Prezidente BJ Habibie to’o Hotel Turizmu nia sorin.
Daudaun ne’e, pesoál seguransa sira hatene ona sira-nia an atu servisu másimu ba hodi fó seguransa, la’ós ba haree so’e foer nian de’it maibé haree mós ema halo movimentu, ema heu lanu no karik mosu konflitu ruma iha jardin laran.
Observasaun no Seguransa Ambiente hosi postu administrativu Nain Feto, munisípiu Dili, Hermegildo Pereira, hateten durante halo seguransa iha jardin Largo de Lecidere, nia parte seidauk iha orientasaun atu kontrola motor para arbiru iha jardin Largo Lecidere nia laran.
“Sira la fó orientasaun maibé iha ne’e mós ami esplika duni ba motor no karreta-na’in sira-ne’ebé para iha jardin laran, maibé sira para nafatin no sira husu ha’u dehan ita-boot parte saida nian. Entaun, ho ida -ne’e ita ko’alia dala ruma araska uitoan, tanba ne’e husu ba parte kompeténte karik bele akompana ho ami atu ema fiar, se lae ema la fiar nafatin ami no kontinua para motor iha jardin laran,” nian hateten.
Entretantu, tuir observasaun jornalista iha terrenu nota katak motor no karreta sira-ne’ebé para iha jardin Largo Lecidere la para iha fatin parajen maibé sei iha motor balun ne’e sei para nafatin iha jardin laran.
Jornalista : Nelia Fernandes
Editór : Cancio Ximenes
