DILI, 09 setembru 2022 (TATOLI)—Governu liuhosi Ministériu Obra Públika dadaun ne’e fó orientasaun ba Kompañia Montana Diak atu halo konstrusaun moru protesaun ba mota ulun iha aldeia Mota Ulun, suku Becora, munisípiu Dili.
Plaka konstrusaun moru protesaun Mota Ulun Becora. Imajen Tatoli/Nelia Fernandes
“Ami hetan orientasaun hosi Obra Públika, tanba iha fulan setembru ne’e ami hetan aseitasaun atu halo servisu entaun iha horisehik ami halo mobilizasaun haruka mákina no kontentór mai lokasi. Ne’ebé, ohin ami hamoos de’it no iha loron segunda ka tersa mak komesa halo servisu khodi ee no chor,” Enjiñeiru Kompañia Montana Diak, Fransiano dos Santos Belo, hateten ba Agência Tatoli, iha Mota Ulun Becora, Dili, sesta ne’e.
Kompañia Montana Diak ne’ebé hetan orientasaun hosi Ministériu Obras Públika atu halo servisu konstrusaun moru protesaun ho naruk metro 350, hosi parte karuk iha titik rua, hanesan titik ida ho naruk metro 100 no titik rua metro 150.
“Kontrusaun moru protesaun iha parte liman-loos ho metru 100, ne’ebé konstrusaun ne’e ho nia total metro hamutuk 350,” nia informa.
Tuir nia, iha kontratu ba konstrusaun moru protesaun ne’e hakerek tinan ida maibé kompañia Montana Diak esforsu an, sei laiha failansu entaun konstrusaun ne’e bele finaliza iha fulan tolu ka haat nia laran de’it.
“Orsida iha implementasaun servisu ami sei inklui ita-nia komunidade lokál atu akompaña ami. Rekruta komunidade hodi akompaña ami halo servisu, nune’e labele mosu problema,” nia dehan.
Entretantu, prosesu konstrusaun moru protesaun ba mota ulun iha aldeia Mota Ulun Becora ho durasaun tinan ida, ho nia totál orsamentu hamutuk $519,439.01.
Jornalista : Nelia Fernandes
Editór : Cancio Ximenes
