iklan

NASIONÁL, JUSTISA, HEADLINE

PM Taur husu direjente MJ servisu bazeia ba lei

PM Taur husu direjente MJ servisu bazeia ba lei

Priméiru-Ministru, Taur Matan Ruak. Imajen Tatoli/Francisco Sony

DILI, 09 setembru 2022 (TATOLI)—Primeiru-Ministru (PM), Taur Matan Ruak, sesta ne’e, hala’o reuniaun aberta ho direjente Ministériu Justisa (MJ) nian hodi fó orientasaun nune’e servisu di’ak liután hodi serbí públiku.

“Iha ha’u-nia mandatu buat barak mak ha’u kontente maibé ha’u foku buat rua, ida ha’u hakarak sertifikadu rai tenke entrega, seluk mak ha’u hakarak rai Estadu hotu iha Timor laran tenki rejistu eletróniku para ha’u hatene sé maka aluga ida ne’ebé no selu oinsá. Maibé Ministru Justisa sesante la kumpre ne’ebé Ministru Justisa atuál tenki kumpre, tanba ne’e ha’u hakarak ita-boot iha tempu badak ne’e kumpre ida-ne’e, sé iha ema ruma la kumpre lei hakoi tiha nia uluk atu sira seluk haree tuir aban-bainrua labele tuir dalan, labele halimar ho sira, lalika tauk presaun, iha ita-nia rain só lei de’it mak boot liu hotu, laiha ema ida boot liu lei,” PM Taur hateten bainhira hala’o enkontru ho direjente MJ iha salaun reuniaun, Colmera.

Notísia relevante: SETP Rekolla Reseita Milaun $4-resin Hosi Arrendamentu Rai

Taur dehan, funsionáriu baibain no kargu xefia MJ nian mak ema ne’ebé lori justisa ba ema, entaun ne’e hatudu ema hotu nia liberdade, no distinu iha MJ nia liman.

“Entaun ida-ne’e maka misaun ne’ebé ita-boot sira tenke halo, tanba ne’e tenke haree ho ema no Estadu nia vida. Ema-nia vida tanba rai ne’e fó valór ba ema, katak iha rai bele peñor hodi foti osan bele dezenvolve ekonomia família no halo nia uma seguru. Enkuantu ba Estadu fó rendimentu rai ninia situasaun regularizadu ne’e atrai investidór tanba aspetu ida importante mak ambiente negósiu,” nia tenik.

Xefe Governu fó ezemplu, foin lalais hasai desizaun ida hodi hasai okupante lubuk ida ne’ebé okupa rai Estadu hanesan grupu Arte Moris.

“Atu dehan katak ha’u kumpre de’it lei. Sira grupu Arte Moris negosia tinan-tolu lakohi sai, ha’u haruka hasai, sé mak fila rai ne’e ita haree tok nia iha lei-nia leten, nia mai fila rai, ema hotu tantu Primeiru-Ministru, Prezidente Repúblika, Parlamentu, hotuhotu iha lei nia okos. Ema ida laiha lei nia leten, sé tuir lei ha’u hakruuk la tuir lei ha’u haruka hasai. To’o balun dehan Primeiru-Ministru fuan laiha, lae! Nasaun ne’e se ita ukun ho fuan de’it, loos duni fuan ne’e importante maibé lei importante liu fali, bainhira ukun uza fuan tinan 20 tan mai ita la hatene Timor nia oin ne’e sai oinsá,” PM tenik.

Xefe Ezekutivu apresia ho servisu MJ tanba fulan-tolu de’it iha tinan 2022 hatama reseita millaun $4 ba kofre Estadu.

“Ha’u kontente tanba Ministru Justisa informa ba ha’u katak iha fulan-tolu kobra millaun $4, ha’u dala ruma tur hanoin katak, sé imi fulan-tolu de’it kobra ona hanesan ne’e, sira seluk iha tinan barak la kobra signifika katak balun ne’e ba fali fatin seluk. Entaun ha’u fó parabéns. Imi kumpre de’it lei lalika tauk presaun hosi sé de’it, maibé tenki ho atensaun sé lae imi mak impoin lei imi mak ba para uluk fali iha kadeia,” nia dehan.

Jornalista   : Antónia Gusmão

Editora        : Julia Chatarina

iklan
iklan

Leave a Reply

iklan
error: Content is protected !!