DILI, 13 setembru 2022 (TATOLI)— Ajénsia Teknolojia Informasaun no Komunikasaun, Institutu Públiku (TIC Timor, I.P) halo hela aprosimasaun ho Ministériu Justisa (MJ) hodi introdús servisu atendimentu tratamentu pasaporte via eletróniku.
“Esforsu ne’ebé daudaun TIC Timor halo hela ho Ministériu Justisa, bele dehan katak sistema eletróniku tiha ona maibé atendimentu maka sei manuál, entaun iha esforsu ida-ne’e ami halo daudaun hela aprosimasaun ho Ministériu Justisa atu haree ida-ne’e,” Diretór Ezekutivu TIC Timor, I.P, Roberto de Sousa Vicente, hateten hafoin relata progresu servisu ba Xefe Governu, iha Rezidénsia Farol, tersa ne’e.
Notísia relevante: TIC Timor, I.P fasilita serbisu ANAAA iha komponente rua
Esforsu ne’ebé TIC Timor, I.P halo maka atu dijitaliza formuláriu tratamentu pasaporte ba sidadaun sira.
Nia dehan, aprosimasaun ne’e halo la’ós de’it ho MJ maibé mós ho Servisu Migrasaun, ezemplu maka iha Aeroportu Comoro, pasajeiru sira tenke prienxe dokumentu migrasaun ho manuál, tanba ne’e presiza dijitaliza.
“Iha nasaun barak ne’e ema dijitaliza hotu ona, la susar ida ka buat ne’ebé lori tempu atu halo. Entaun esforsu ne’ebé ami halo daudaun hela hodi fornese solusaun ba sira hodi redús produsaun surat-tahan no ema-nia tempu. Ne’e servisu ne’ebé daudaun ami halo hela,” nia tenik.
Jornalista : Antónia Gusmão
Editora : Julia Chatarina
