22 setembru, Lú-Olo bá hala’o tratamentu médiku iha Malázia
DILI, 16 setembru 2022 (TATOLI)— Vise Ministru Saúde, Bonifacio Muacoli dos Reis, informa iha loron 22 setembru ne’e, Ministériu Saúde transfere eis Prezidente Repúblika, Francisco Guterres Lú-Olo, bá hala’o tratamentu médiku iha Ospitál Malázia.
“Eis Prezidente Repúblika Francisco Guterres Lú-Olo, daudaun ita nia profisionál saúde haree nia evolusaun no kontinua akompaña hala’o tratamentu saúde, maibé iha loron 22 setembru agora, ita sei halo transferénsia ba ospitál I Heal Malázia hodi kontinua hala’o tratamentu,” hateten, Vise Ministru Saúde ne’e ba jornalista sira iha salaun MS, Caicoli, sesta ne’e.
Daudaun ne’e, Atuál Prezidente Partidu FRETILIN ne’e baixa iha Hospitál Nasionál Guido Valadares (HNGV), iha sala VIP númeru 01, hahu iha segunda (12/09) to’o ohin, hodi hala’o tratamentu saúde tanba sofre moras balun.
Nia esplika eis Prezidente Repúblika sei arranka bá Malázia hodi hetan tratamentu saúde hosi médiku espesialista kardiolojia.
“Médiku espesiálista sira kontinua akompaña kondisaun saúde eis Prezidente Repúblika, bainhira laiha mudansa mak transfere direta hosi Dili bá kedas Malázia, atu médiku espesiálista Kardiolojia kontinua halo tratamentu,” nia afirma.
Jornalista : Felicidade Ximenes
Editór : Florencio Miranda Ximenes
