KAPITÁL, NASIONÁL

ONG Hatutan-Governu sei konstrui lixeira hitu iha merkadu Manleuana

ONG Hatutan-Governu sei konstrui lixeira hitu iha merkadu Manleuana

Trabailadores sira raut hela lixu iha area kampun baru komoro. Imajen Tatoli/Antonio Daciparu

DILI, 16 setembru 2022 (TATOLI)—Organizasaun Naun Governamentál (ONG) hamutuk ho Governu liuhosi Servisu Apoiu Sosiedade Sivil no Auditoria Sosiál (SASCAS, sigla portugés), tuir planu sei konstrui lixeira hitu (7) iha merkadu Manleuana no aldeia Di’ak.

“Ita hatene katak lixu ne’e prodús barak liu mós hosi parte komérsiál no mós lixu uma kain ne’ebé kontribui mós ba lixu ho nia volume ne’ebé boot tebes iha sidade sira ka área urbana sira. Entaun, inisiativa ne’e NGO Hatutan parseria ho SASCAS fó tulun fundu kiikoan ida-ne’e, hodi bele tulun komunidade atu bele reforsa tan ba iha jestaun lixu uma kain no lixu komérsiál nian iha ámbitu ba moris lor-loron. Tanba, ita hatene katak se kontinua ita hotu moris moos, ida-ne’e bele atria ijiéne no ita bele saúdavél,” Seniór Koordenadór ONG Hatutan, Fortunato Carmona, hateten ba jornalista sira, iha ámbitu lansamentu programa Díli moos, atrátivu, ijiéniku no saúdavel ba vendedór sira iha merkadu Manleuna, Díli, sesta ne’e.

Tuir planu, lixeira hitu (7) ne’ebé mak atu konstrui iha aldeia Badi’ak no áreadores Merkadu Manleuana, hamutuk lixeira  neen (6) lixu movel no ida lixu permanente.

“Entaun, lixeira ne’ebé sei harii ne’e mai ho separasaun lixu, ne’ebé bele dehan katégoria lixu orgániku no lixu anorgániku. Depois, ita mós bele halo kategorizasaun balun ba iha plástik, botir, masa no mós ba lixu bokon sira, liU-liu hanesan modo-tahan no sasán restu sira-ne’ebé uza iha komérsiu no uma kain,” nia dehan.

Maske nune’e, programa ne’e la’ós haree de’it ba iha konstrusaun lixeira maibé mós mai ho programa atividade seluk tanba konstrusaun ne’e hanesan tarefa ida atu bele tulun komunidade ba iha oinsá atu prevene soe lixu arbiru no hadook an hosi moras.

Nune’e, iha programa ne’e, ONG Hatutan la’o ho SASCAS ba programa hotu-hotu ne’ebé halo, liu-liu ba dezenvolve matadalan hamutuk rihun $15 ba apoiu durante fulan neen (6) nia laran tenke kompleta rihun$15.

“Hosi ne’e, kontribui rasik hosi NGO mós bele atinje to’o milliaun $16 ba iha programa estabelese komíté ba asaun limpeza jerál, kria regulamentu matadalan no konstrusaun lixeira ne’ebé ho medida permanente 2×5 no lixu movel 2×2, ne’ebé sei halo ho kuantidade hamutuk lixeira hitu (7),” nia informa.

Diretór Agua no Saneamentu Munisípiu Dili Reprezenta Servisu Apoiu Sosiedade Sivil no Auditoria Sosiál (SASCAS, sigla portugés), Hermenio Moniz Ribeiro, hateten komunidade tenke iha konxiénsia atu labele soe lixu arbiru tanba loro-loron Parlamentu Nasionál, Orgaun Soberanu, Membru Governu no Sosiedade Sívil sira hotu hakilar Autoridade Munisípiu Dili (AMD) katak lixu iha fatin-fatin la organizadu.

“Tanba ne’e, inisiativa di’ak hosi ONG Hatutan mai ho programa D+ ne’e importante tebes. Maibé, ohin ha’u hateten ona, ninia xave ne’e ida de’it, ita bele iha karreta 50 organiza hodi tula lixu ne’e iha Dili laran, ita bele iha kontetór tau ona iha fatin-fatin, ita bele iha lixeira ne’ebé mak konstrui provolta 50-resin iha Dili laran, maibé xave mak bainhira laiha konxiénsia ne’e Dili sei la moos,” nia dehan.

Tanba, nia dehan, iha merkadu Manleuana ne’e pesoál Jestaun Merkadu sira liu ba mai haree lixu ne’e namkari iha fatin-fatin ne’ebé prodús hosi negosianta sira iha merkadu laran ne’e rasik.

Maske iha kamioneta hamutuk 23 ne’ebé mak tuir regulamentu kada loron ne’e tula lixu iha postu administrativu Dom Aleixo no iha merkadu Manleuna ne’e, no kada loron ida lixu ne’ebé kamioneta tula lixu loris ai ba fakar iha lixeira Tibar-Liquiça ne’e bele atinje to’o tonelada 200.

“Ha’u hateten ba ita-boot sira katak tibar ne’ebé ne’e lixu bele to’o tonelada 200 loron ida. Kuandu ita so’e lixu arbiru de’it hanesan ne’e la organiza, ha’u lahatene loos kuandu Tibar ne’e lixu nakonu, ita atu ba fali ne’ebé. Ita agora bele moris kontente maibé ita-nia oan no bei’oan sira problema boot. Tanba ne’e, ha’u dehan ba ita-boot sira kuandu konxiénsia la hahú hosi ita ba iha kraik, ida-ne’e problema. Tanba ami halo sensibilizasaun iha fatin barak ba fali iha aldeia no suku sira maibé nafatin, ema laiha konxiénsia atu soe lixu iha nia fatin,” nia dehan.

Maske nune’e, daudaun ne’e kamioneta 50 ne’ebé foti lixu iha Dili laran hodi ba soe iha Tibar, nia parte haree katak kamioneta hirak ne’e sei kobre lixu ne’ebé komunidade Dili prodús loron ba loron ne’e, sis usar tebes Dili sai sidade moos tanba komunidade laiha konxiénsia atu kontribui soe lixu iha lixeira.

“Ema barak mai hakarak haree kona-ba lixu no ONG mós barak hakarak haree kona-ba jestaun lixu, maibé liafuan ne’ebé Autoridade Munisípiu Dili simu katak ita bele halo buat hotu mós konxiénsia hosi komunidade iha ka lae. Maibé, ami iha planu ona, atu lakohi eduka ema boot sira tanba ema boot, ita ko’alia hosi tilun sorin sai hosi tilun sorin. Tanba ne’e, ami iha ona planu atu ho NGO sira atu hahú hosi labarik estudante sira, ne’ebé hosi Pré-Eskolár (TK), Pré-Primária (SD) no Pré-Sekundária (SMP), maibé Sekundária (SMA) no parese sira-ne’e mak ba konvense inan-aman sira atu depois ita bele iha konxiénsia soe lixu iha nia fatin,” nia dehan.

Jornalista : Nelia Fernandes

Editór      : Cancio Ximenes

iklan
iklan

Leave a Reply

iklan
error: Content is protected !!