Aviaun Royal Bhutan Airlines “Drukair” hahú reativa voo Dili-Singapura
DILI, 19 setembru 2022 (TATOLI)— Aviaun Royal Bhutan Airlines “Drukair” ho númeru boin A319, iha domingu ne’e, reativa rute regular Díli -Singapura, hafoin paradu voo iha 2020, tanba pandemia COVID-19.
“Ami kontente loos, tanba ita bele reativa fali hodi hala’o voo ida ne’e ba fulan ida dala-ida. Maibé, iha novembru ita sei halo fulan ida dala rua no iha dezembru fulan dala tolu,” Diretór Ezekutivu, Royal Aviaun Bhutan Airlines Drukair, Tandi Wangchuk, hateten liuhosi konferensia imprensa ne’ebé halo iha salaun VIP, Aeroportu Internasionál Nicoláu Lobato Comoro, Díli.
Tuir nia, hafoin hasoru obstakulu durante tinan rua tanba pandemia COVID-19, Aviaun Royal Bhutan Airlines ou Drukair A319 bele reativa fali no promote sei halo atendimentu ho di’ak ba pasajeiru sira.
Iha fatin hanesan Diretór Ezekutivu, Air Timor, Rafy K, agradese ba aviaun Drukair, tanba sei nafatin fó konfiansa ba Air Timor hodi halo kooperasaun iha área servisu aviasaun, entre Díli no Singapura.
“Ita foin iha voo fulan dala ida, maibé ba oin ita harakak aumenta tan hodi promove setór turizmu no ekonomia ba rai ida ne’e” nia agradese.
Entretantu, Prezidente Konsellu Administrasaun Autoridade Aviasaun Sivil Timor-Leste (AACTL, iha inglés), Eusébio Freitas, husu ba operadór sira husi Royal Bhutan Airlines “Drukair” ho boin A319 atu garante seguransa ba pasajeiru sira nian.
“Hanesan Autoriadade Aviasaun Sivil husu atu operador sira mantein nafatin ninian performers security save nian, atu nune’e ita-nia pasajeiru sira bele viájen ho seguru,” nia fó hanoin.
Tuir observasaun jornalista nian iha tereñu nota katak, Royal Brutan Airlines ou Drukair A319 too iha Aeroportu Internasionál Nicoláu Lobato Comoro iha 07: 48.
Aviaun Royal Bhutan Airlines A319-115 (A319), ne’ebé hahú voo iha marsu 2015, ne’e kompleta ho kadeira ka tuur fatin hamutuk 118, kompostu hosi klase komersiál 16 no klase ekonomia 102.
Tuir oráriu aviaun Bhutan hahú voo iha domingu ne’e no sei hala’o fali voo iha loron 16 outubru 2022, 6 novembru 2022 no iha loron 4, 11, 18 dezembru 2022. Voo sei kontinua ativa tuir nesesidade ho folin billete hahú $450.
Jornalista: Nélia Fernandes
Editór : Florencio Miranda Ximenes
