DESPORTU, HEADLINE

MEJD no SEJD inisia promosaun atividade fízika iha estabelesementu públiku

MEJD no SEJD inisia promosaun atividade fízika iha estabelesementu públiku

Primeiru-Ministru, Taur Matan Ruak, prezide reuniaun Konsellu Ministru, iha Palásiu Governu, kuarta (21/09). Imajen Tatoli/Francisco Sony

DILI, 21 setembru 2022 (TATOLI)—Vise-Ministru Edukasaun, Juventude no Desportu (MEJD), António Guterres no Sekretáriu Estadu Juventude no Desportu (SEJD), Abrão Saldanha, aprezenta projetu rezolusaun Governu iha reuniaun Konsellu Ministru (KM) ordinária, kuarta ne’e, kona-ba promosaun prátika atividade fízika iha estabelesimentu públiku.

“Projetu rezolusaun ne’ebé hetan aprovasaun ne’e ho perspetiva promosaun atividade fízika no hasa’e populasaun nia konsiénsia kona-ba importánsia atividade fízika ba saúde no implementasaun polítika intersetoriál no multidixiplinár sira, ho objetivu atu hamenus sedentarizmu,” Ministru Prezidénsia Konsellu Ministru, Fidelis Manuel Leite Magalhães, relata hafoin ramata reuniaun ezekutivu, iha Palásiu Governu.

Notísia relevante: Governu Deside Fó Toleránsia Pontu Loron-Rua Halo Limpeza Jéral

Nune’e, Governu sei estabelese promosaun atividade fízika iha órgaun no servisu administrasaun públika hodi dedika períodu tempu semana ida atu prátika atividade fízika iha ninia tipu no modalidade oin-oin.

Órgaun no servisu administrasaun públika sira hotu ne’ebé dependente iha Governu tenke promove atividade fízika hosi parte funsionáriu sira, ho durasaun la liu oras ida, iha loron sesta, entre tuku 16:30 to’o tuku 17:30.

“Períodu tempu ne’e sei bele hamenus ka sei la hala’o bainhira iha justifikasaun ho razaun interese públiku, liuliu atu asegura funsionamentu regular órgaun no servisu administrasaun públika nian,” nia subliña

Aleinde ne’e, Governu apela mós ba organizasaun, sosiedade sivil no empreza sira iha setór privadu atu hamutuk no promove prátika ne’e, ho ninia kolaboradór no traballadór sira durante oras ida iha semana ida.

Atividade fízika ne’e sei la hala’o iha semana ikus fulan-ida nian, atu garante ezekusaun limpeza jerál ne’ebé eziste iha territóriu nasionál.

Jornalista   : Antónia Gusmão

Editora        : Julia Chatarina

iklan
iklan

Leave a Reply

iklan
error: Content is protected !!