iklan

NASIONÁL, KAPITÁL

AMD muda vendedór na’in-41 iha eis-merkadu Comoro ba Manleuana

AMD muda vendedór na’in-41 iha eis-merkadu Comoro ba Manleuana

Jestór Merkadu Manleuana muda ona negosiante faan Iha jardin Merkadu Manleuana ba merkadu laran. Imájen Tatoli/Nelia Fernandes..

DILI, 23 setembru 2022 (TATOLI)—Xefe Departamentu, Jestaun no Merkadu iha Autoridade Munisípiu Dili (AMD), Gaspar da Silva informa, kinta (22/09) ne’e, AMD muda ona vendedór hamutuk na’in-41 iha eis-merkadu Comoro ba merkadu Manleuana.

“Relasaun ho despaixu ne’ebé mai hosi ami-nia superiór tun mai, atu muda maluk vendedór sira iha eis-merkadu Comoro, entaun hoirsehik ita konsege ezekuta orden no ita muda sai ona ita-nia vendedór hamutuk na’in-41. Ne’ebé, ita mós prepara fatin no kondisaun ne’ebé di’ak ita lori ba iha merkadu Manleuana,” Gaspar da Silva hateten ba Agência Tatoli iha nia kna’ar fatin, Díli, sexta ne’e.

Nia esplika, prosesu halo mudansa ba vendedór hamutuk 41 iha eis-merkadu Comoro, tanba antes ne’e Jestaun no Merkadu ba aviza ona atu vendedór hirak ne’e muda ba merkadu Manleuana.

“Ita-nia vendedóe sira-ne’e, ita ba aviza ona no depois rai ne’ebá rai privadu entre kompañia líder, entaun momentu ne’e sira mós halo konkordánsia entre kompañia. Hosi ne’e, sira konkordánsia hotu kompañia mós ko’alia ho sira tuir konkordánsia, entaun balun la tuir fali. Tanba ne’e mak kompañia halo pedidu mai ita-nia Prezidente atu husu para apoiu, atu nune’e ita ba muda ita-nia maluk sira iha ne’ebá hodi ba tau fali iha fatin ne’ebé mak prepara hanesan merkadu Manleuana,” nia dehan.

Nia hateten, hosi prosesu mudansa horisehik ne’e vendedór sira ba hotu foti númeru maibé balun tanba dook, entaun sira hili katak sira ba foti de’it numeru no sei tetu hodi haree lai, maibé iha horisehik sira-nia sasán ekipa jestaun merkadu lori ba hotu iha merkadu Manleuana.

“Ho prosesu mudansa ba ita-nia vendedór sira-ne’e, ita garante ona katak horisehik muda kompañia Líder rasik atu hahú ona prosesu konstrusaun, tanba fatuk mós sira komesa tau daudaun ona no horisehik iha ne’ebá mós halo tetuk ona. Hosi ne’e, ita mós estabelese ona ekipa ida atu bele fo seguransa provizória iha ne’ebá hamutuk ho ita-nia komandante sira atu evita ema sira labele halo atividade negósiu iha fatin refere,” nia hateten.

Jornalista : Nelia Fernandes

Editór       : Cancio Ximenes

iklan
iklan

Leave a Reply

iklan
error: Content is protected !!