DILI, 23 setembru 2022 (TATOLI)–Meterolojista hosi Dirasaun Nasionál Meterolojia Jeofizika ((DNMG, sigla portugés), Simão Fernandes, alerta posibilidade sei akontese udan ho intensiade boot iha Timor-Leste iha fulan hirak tuir mai.
Notísia Relevante: DNMG alerta posibilidade akontese udan ho intensidade moderadu-forte semana ne’e
“La Nina nu’udar fenomenu ida-ne’ebé mak kauza tempu-udan antes udan. Tan ne’e, iha tempu ne’ebá sei iha udan maka’as. Maibé sistema ida-ne’e sei la hamosu udan no anin-boot hanesan loron 4 fulan-abril tinan kotuk tanba la forma Siklone Tropikal Seroja iha illa ida besik país ne’e,” Simão Fernandes hateten ba AgênciaTatoli, iha Caicoli, Dili.
Meterolojista ne’e fó-hanoin katak Siklone Tropikal Seroja akontese iha tinan kotuk tanba formasaun iha parte Sudeste Nusa Tenggara Timur (NTT, Indonézia) no fó hanoin mós katak inundasaun ne’ebé akontese iha tinan rua ikus ne’e, kauza mate no estragu barak iha rai-laran.
Tuir monitorizasaun hosi Dirasaun Nasionál Meteorolojia no Jeofizika, Timor-Leste kontinua esperiénsia udan ho intensidade entre 50% no 80% to’o tinan nia rohan.
“Ami husu ba populasaun tomak iha Dili atu labele pániku atu evita rumór no tau atensaun nafatin ba fenomenu naturál atu labele tau moris iha risku bainhira udan no anin maka’as mosu,” nia dehan.
Meterolojista ne’e mós husu atu kontinua ho informasaun kona-ba mudansa klimátika iha pájina DNMG.
“Ami mós husu ba toos-na’in hotu-hotu atu prepara kondisaun hodi hamenus sasán ne’ebé aat,” nia alerta.
Notísia Relevante: Mercy Corps entrega ekipamentu SAR-EWS ba SEPC, IPG no DNMG
Jornalista : Osória Marques
Editór : Cancio Ximenes
