MS husu profisionál saúde labele diskrimina pasiente HIV-SIDA
DILI, 23 setembru 2022 (TATOLI) – Ministra Saúde, Odete Maria Freitas Belo, husu ba profisionál saúde sira atu labele diskrimina ema ho moras HIV-SIDA bainhira sira ba halo tratamentu iha fasilidade saúde.
“Husu ba profisionál saúde sira tanba dala barak enfermeiru no parteira sira la hatene rai segredu pasiente nian kona-ba HIV signifika ita halo diskriminasaun ba pasiente sira, entaun ida ne’e sai fatór ida ba pasiente atu moe hodi la ba halo tratamentu iha fasilidade saúde sira”, Minsitra Saúde, Odete Maria Freitas Belo, hateten iha salaun INS, Comoro, ohin.
Ministra husu mós ba komunidade liuliu família sira atu labele halo diskriminasaun ba ema ne’ebé afeta ba moras HIV/SIDA, nune’e pasiente sira bele kontinua halo tratamentu, se la’e para iha dalan klaran tanba moe.
“Tuir peskiza ne’ebé mak iha katak diskriminisaun ka estigma makaas liu no halo pasiente sira moe hodi ba halo tratamentu iha fasilidade saúde sira”, afirma.
Governante ne’e husu ba pasiente sira atu konsumu aimoruk ho regularmente liuliu inan sira aatu moras labele da’et ba bebé iha kabun laran.
“Iha indikadór ne’ebé mak Ministériu Saúde foti mak populasaun hotuhotu tenke hatene nia kondisaun rasik, kona-ba moras hadaet ruma liuliu HIV-SIDA, entaun ida ne’e presiza ba halo konsulta atu hatene ita nia kondisaun moras sira hodi halo prevensaun sedu”, revela.
Tuir dadus husi Ministériu Saúde, husi 2003 to’o juñu 2022, totál kazu HIV SIDA hamutuk 1.704, husi númeru ne’e, ema ne’ebé mate ba HIV SIDA hamutuk 271 no fahe ba kategoria grupu idade menus husi tinan lima hamutuk 51, tinan neen to’o 14 hamutuk 18, idade 15 to’o 24 hamutuk 461, idade 25 to’o 44 hamutuk 1.022, idade 45 ba leten hamutuk 152.
Jornalista : Felicidade Ximenes
Editór : Zezito Silva
