iklan

EKONOMIA, BOBONARO, HEADLINE, MUNISÍPIU

PDHJ deteta irregularidade iha distribuisaun Cesta Bázika iha Lahomea

PDHJ deteta irregularidade iha distribuisaun Cesta Bázika iha Lahomea

Diretór PDHJ Territoriál Bobonaro, Domingos Pinto Tavares. Imajen Tatoli/Sérgio da Cruz.

BOBONARO, 27 setémbru 2022 (TATOLI)-Prevedoria Diretu Umanu no Justisa (PDHJ), delegasaun territoriál Maliana, deteta irregularidade ne’ebé komete hosi kompañia Nahliva Unipesoál Lda, halo distribuisaun Cesta Bázika faze daruak ba komunidade sira iha suku Lahomea, postu administrativu Maliana, munisípiu Bobonaro.

Diretór PDHJ Delegasaun Territoriál Maliana, Domingos Pinto Tavares, esplika, irregularidade ne’e ekipa fiskalizasaun sira deteta iha loron-sesta, 24 setembru semana kotuk, bainhira kompañia Nahliva Unpesoál Lda, halo distribuisaun ba benefisiáriu sira iha aldeia Achula-kha.

Notísia relevante: Abitante Ritabou kestiona kompañia kahur produtu ‘fuhuk’ iha Cesta Bázika

“Ita kestiona ne’e maka na’an ne’e, iha-ne’ebá tuir sira-nia presu ne’ebé maka Ministériu Komérsiu no Indústria aprova katak, kada ema tenke hetan na’an kilograma rua, ruin kilograma ida ho isin kilograma ida, maibé ami deteta isin kilograma ida de’it, entaun sei falta ruin ne’e,” nia ko’alia iha Maliana, tersa ne’e.

Nune’e, iha loron 27 setembru ne’e, ekipa monitorizasaun hosi PDHJ tún ba terrenu halo konfirmasaun ho kompañia atu klarifika no fó resposta.

Bainhira kompañia la konsege rezolve, PDHJ nu’udar instituisaun kontrolu sei rekomenda atu nune’e  ba oin Ministériu Turizmu, Komérsiu no Indústria atu halo pagamentu ne’e haree tuir tabela ne’ebé kompañia ne’e la konsege responde.

“Ne’e katak hosi na’an ne’ebé mak sira fahe ne’e, ema ida hetan de’it kilograma ida ho balun, entaun ema ida hetan de’it $40 tuir kalkulasaun presu ne’ebé maka ami hetan, abitante ida sei falta $5,” PDHJ Maliana hateten.

Maibé Pinto haktuir, produtu seluk ne’ebé kompañia fahe komposta hosi  importadu no lokál maioria kapaas no kualidade di’ak hotu.

“Ezemplu sira-nia repollu ne’e, tesi kedas iha komunidade nia to’os laran, lori ba sira hasai halo moos hotu tiha maka entrega ba komunidade, tomate mós sira lori mai fakar iha lona, ema hotu haree di’ak hotu mak foin fahe, hudi mós di’ak hotu,” nia katak.

Diretór Domingos apela ba kompañia fornesedór sira iha munisípiu Bononaro ne’ebé mak Governu fó fiar atu fahe ai-haan ba komunidade sira tuir regra ne’ebé fó-sai ona.

“Imi bele hanoin buka lukru, maibé keta haluha fó buat-ne’ebé maka kualidade di’ak ba komunidade, tanba sira-ne’ebé haan la’ós ema seluk, mesak inan-aman, maun alin de’it, dalaruma imi rasik mós hetan tán, entaun imi tenke fó buat-ne’ebé di’ak atu komunidade haan fó saúde di’ak ba sira-nia isin,” Diretór Domingos fó hanoin.

Kestaun ne’e Korresponde Agência Tatoli ne’ebé destaka iha Bobonaro, tenta konfirma ho na’in ba kompañia Nahliva Unipesoál Lda, maibé laiha fatin tanba okupadu ho serbisu seluk.

Populasaun suku Lahomea feto no mane ne’ebé benifísia ba programa ne’e hamutuk na’in-5.064 ho totál xefe família 3.064, maibé sei iha reklamante 100-resin.

Notísia relevante: MKAE rekoñese empreza balun fahe produtu Cesta Bázika a’at

Jornalista: Sérgio da Cruz

Editór: Evaristo Soares Martins

iklan
iklan

Leave a Reply

iklan
error: Content is protected !!