iklan

BOBONARO, MUNISÍPIU

UNIJMA lamenta ho aktu sidadaun estranjeiru pinta arbiru bandeira RDTL

UNIJMA lamenta ho aktu sidadaun estranjeiru pinta arbiru bandeira RDTL

Uniaun Nasionál Juventude Maubere (UNIJMA), Ativista Pro Repúblika Demokrátika Timor-Leste (RDTL), CPD-RDTL/FRETILIN, Rejiaun Fitun Otas Bobonaro. Imajen espesiál.

BOBONARO, 27 setembru 2022 (TATOLI)—Uniaun Nasionál Juventude Maubere (UNIJMA) ativista pro Repúblika Demokratika Timor-Leste (RDTL),CPD-RDTL,munisípiu Bobonaro, lamenta ho aktu sidadaun estranjeiru naran Jhan Patrick Fischer ne’ebé pinta hodi dezeña arbiru Bandeira Repúblika Demokratika Timor-leste (RDTL) hafoin públika iha mídia sosiál Facebook.

Portavós CPD-RDTL, Bobonaro, José dos santos, haktuir iha loron 11 fulan-setembru tinan 2022 JPF públika iha nia pájina ofisiál facebook ne’ebé pinta kór oinoin ho nia símbolu kada munisípiu, tanba ne’e konsidera viola ona Bandeira lulik ne’ebé hetan liuhosi funu naruk ne’ebé ema barak sakrifika-aan, fakar-raan no lekar ruin lemo-lemo.

Notísia relevante: UNIJMA Bobonaro reafirma apoia Lú Olo iha eleisaun volta daruak

“Nune’e ezije ba estadu atu governu, investiga no identifika lalais malae sira-ne’e ho nia kolaborasionista sira hodi konsege ho kodigu penal ho artigu 206 no duni sai kedas hosi Timor-Leste,” José dos santos, informa liuhosi komferénsia imprensa iha Bairru SMP II,  Maliana, tersa ne’e.

Portavós ne’e husu ba governu atu haka’as instituisaun sira-ne’ebé toma konta ba servisu investigasaun, tanba iha loron 13 fulan setembru ne’e timoroan Adelino da Silva  aprezenta ona ba Polísia Sientífika Investigasaun Kriminál (PCIC, sigla portugés) ho evidénsia komprovativu sira hanesan fotografia.

“To’o ohin loron PCIC rasik seidauk hatudu rezultadu ba komunidade ne’ebé hato’o keixa no ba iha públiku ninia fotografia anexu,” nia hateten.

Purtantu Bandeira Nasionál nia forma retangulár ho triangulu izóseles rua ne’ebé nia bazes sobrepostas ka hatuur ba malu, iha triângulu ida kôr metan ho altura ka aas hanesan un tersu kumprimentu ne’ebé hatuur ba ida seluk ho kôr kinur, i ida ne’e nia aas mak hanesan metade bandeira nia kumprimentu ka naruk. Iha loloos triângulu ho kôr metan nia klaran hatuur fitun mutin ida ho rohan naruk lima, ne’ebé simboliza naroman atu hatudu dalan. Fitun mutin nia rohan ida nakfila ba leten no hali’is ba sorin karuk, ba bandeira nia rohan leten liu. Bandeira nia parte sira seluk kôr mean tomak.

  • Kinur – kolonializmu nia ain-fatin
  • Metan – nakukun no beik laran ne’ebé tenke halakon;’
  • Mean – luta ba libertasaun nasionál;
  • Mutin – dame.

Emblema nasionál

Enkauntu Emblema Nasionál hanaran Belak no simboliza globu terrestre ka mundu kabuar ne’ebé inklui mós Timór-Leste, i nia mak símbolu unidade Nasionál.

Elementu símbolu

Kôr mutin iha sirkunferênsia ka risku kabuar laran, fitun no nia naroman simboliza páz. Naroman mutin husi fitun simboliza naroman solidariedade no determinasaun atu lori dame ba mundu tomak. Fitun mutin nia rohan-naruk lima simboliza laran luak no laran moos ne’ebé hatudu ba Povu dalan ba dame.

Iha sirkunferênsia nia laran, iha fali parte ne’ebé kle’an liu no kôr mutin nia leten ba, hatudu insígnia Foho Ramelau nian, ne’ebé pinta ho kôr mean iha nia ninin tomak, no kôr metan iha parte klaran, ne’ebé hadulas ho linha kinur osa-mean ida. Linha ne’ebé kinur, no mós livru nia faixas i marjens ka ninin, batar fulin ho háre fulin (espigas), roda ho nehan, rama-inan (arco) no rama isin (flecha) simboliza Riqueza ka Rikusoin tomak.

Kôr metan iha Foho Ramelau klaran, kilat automátika no letras livru nian, simboliza obskurantizmu ka nakukun no beik laran ne’ebé tenke buka halakon. Kontornu ka linha ne’ebé hadulas Foho Ramelau ho kôr mean, letras, arus ka arkus, faixas nia kontornus ho livru, simboliza domin ba pátria i luta ba libertasaun nasionál.

Ângulus ka sikun haat hamutuk ne’ebé integra insígnia Foho Ramelau simboliza prinsípiu kona-ba separasaun poderes no interdependênsia entre órgauns soberania Estadu.

Livru ne’ebé naloke hela, roda ho nehan, batar fulin i háre fulin (espigas) hotu hamutuk simboliza sebedoria ka matenek no kbiit povu nian iha kontextu dezenvolvimentu áreas Edukasaun, Kultura, Justisa Sosiál, no mós áreas Agríkolas i industriais.

Kilat naruk automátika, modelu AK-47/Galaxi, rama inan (arco) i rama isin (flecha) hotu hamutuk simboliza valores luta rezistênsia Povu nian ba Libertasaun Nasionál no autu-defeza ba onra ho dignidade soberania durante sékulus ka tinan atus-ba-atus.

Lema UNIDADE, ASAUN, PROGRESU, reprezenta valores bázikus polítika no morál ne’ebé hatuur Nasaun no Povu tomak nia moris bá.

Jornalista: Sérgio da Cruz

Editór: Evaristo Soares Martins

iklan
iklan

Leave a Reply

iklan
error: Content is protected !!