Aimoruk moras Psiquiatra la sufisiente iha HNGV

DILI, 28 setembru 2022 (TATOLI) – Médiku Psiquiatra, Edmundo Monteiro, hateten aimoruk ba moras psiquiatra (Moras psikolojia) iha Hospitál Nasionál Guido Valadares (HNGV) la sufisiente atu halo tratamentu ba pasiente sira.
“Aimoruk ba moras psiquiatra, daudaun ne’e, la sufisiente atu halo tratamentu ba pasiente sira, entaun difikulta tebes ami nia servisu, maske pasiente sira presiza duni aimoruk lorloron, liuliu ba pasiente agresivu sira maibé daudaun ne’e aimoruk la iha”, Médiku Psiquiatra Hospitál Nasionál Guido Valadares (HNGV), Edmundo Monteiro, hateten iha nia kna’ar fatin, HNGV ohin.
Nia dehan, aimoruk ne’ebé ladún sufisiente no halo médiku sira hanoin barak tanba hakarak pasiente sira ne’e di’ak. Maske nune’e, aimoruk balun ne’ebé sei iha bele uza hodi pasiente sira aguenta.
“Aimoruk balun ami asegura, liuliu aimoruk Clorpromazina nian ne’e sei iha maibé estoke limitadu tanba ne’e, antes ami atu simu pasiente sira husi enfermeiru no responsável sira katak pasiente moras agresivu ga lae, nia siak estraga sasan duni, entaun bele lori mai halo tratamentu iha ne’e tanba ami konsidera ida ne’e hanesan emerjénsia psikataria”, revela.
Aimoruk ne’ebé laiha mak aimoruk Haloperidol no Olanzapine, ida ne’e ba tratamentu ema moras pisikolia ne’ebé agresivu liu. Entaun aimoruk ne’e limitadu, pesoál saúde sira fó tratamentu ba pasiente moras mentál sira ho aimoruk oin ida de’it.
“Antes ne’e, ita nia opsaun tratamentu mak iha aimoruk oin rua ka oin tolu hodi uza. Maibé agora aimoruk ne’ebé limitadu no ami fó oin ida deit mak hanaean aimoruk Clorpromazina tanba ne’e mak hakarak ka lakohi pasiente sira ne’e ami tenke fó aimoruk hanesan”, refere.
Husi janeiru to’o juñu pasiente ne’ebé mak tenta oho aan, baixa iha sala acute-care HNGV hamutuk 17, maioria inan feton sira husi idade 16 to’o 40.
“Pasiente sira ne’e maioria halo akonselamentu husi doutó sira mak halai liu ba sira nia problema familiar, entaun ida ne’e presiza akompaña ho aimoruk”, Esplika.
Pasiente sira ne’ebé baixa ne’e, maioria mai husi munisípiu Dili maibé la taka dalan ba pasiente sira husi munisípiu sira seluk. Agora daudaun pasiente ne’ebé mak baixa iha HNGV hamutuk na’in neen no maioria feto.
Jornalista : Felicidade Ximenes
Editór : Zezito Silva

