iklan

BOBONARO, HEADLINE, MUNISÍPIU, SEGURANSA

Task Force-BOP sei buka-tuir grupu joven tuda malu iha Maliana

Task Force-BOP sei buka-tuir grupu joven tuda malu iha Maliana

Komandante PNTL Munisípiu Bobonaro, Superintendente Antoninho Mauluta. Imajen Tatoli/Sérgio da Cruz.

BOBONARO,28 setémbru 2022 (TATOLI)-Komandante Polísia Nasionál Timor-Leste (PNTL) munisípiu Bobonaro, Superintendente Antoninho Mauluta, orienta ona membru Task Force serbisu hamutuk ho Batallaun Orden Públika (BOP) hala’o patrullamentu iha tempu kalan, hodi buka-tuir grupu joven ne’ebé kalan-kalan sempre tuda malu iha kapitál Maliana hodi perturba orden públiku.

Notísia relevante: PNTL Bobonaro entrega suspeitu ne’ebé ameasa F-FDTL no PNTL ba Ministériu Públiku

“Sira provoka malu iha merkadu, ha:u rasik hatún ona orden ba komandante operasaun atu koordena ho BOP oinsá atu halo patrullamentu, liuliu iha kalan, wainhira iha patrula ne’e fora hosi tuku 19:00 ita la tolera joven ne’ebé tuur iha trotoar leten,” nia informa ba Jornalista sira, iha Maliana, kuarta ne’e.

Superintendete ne’e subliña, kona-bá kazu ne’ebé joven sira kalan-kalan provoka malu iha merkadu Maliana, polísia seidauk hetan informasaun klaru, tanba ne’e husu ba komunidade sira informa ba autoridade seguransa no garante sei la fó-sai naran fonte ne’ebé pasa informasaun.

Bainhira autoridade seguransa identifika joven sira tuur grupu halimar iha dalan ninin, sei haruka fila ba Uma,.no bainhira lakohi kopera sei foti lori hotu ba presta deklarasaun iha komandu munisípiu Bobonaro.

“Ba oin ita sei la tolera kualkér grupu sé de’it, arte-marsiál no arte rituál halo problema kalan provoka malu beibeik ita sei atua,” nia afirma.

Komandante António dehan, asaun provoka malu ne’e akontese ligada ho kazu ne’ebé akontese iha suku Raifun, postu administrativu Maliana, semana kotuk iha atvidade dahur no tebes-tebe ba enseramentu verifikasaun dadus kombatente libertasaun nasionál.

“Ita identifika suspeitu na’in-haat no oras ne’e daudaun kazu ne’e rejistu ona iha Ministériu Públiku, depois mak ita haree nia kontinuasaun, ita mós sei akompaña nafatin iha prosesu nia laran,” Komandante ne’e haktuir.

Notísia relevante: PNTL Bobonaro koloka efetivu 145 asegura graduasaun kandidatu PSHT

Jornalista: Sérgio da Cruz

Editór: Evaristo Soares Martins

iklan
iklan

One Comment

  1. Aprecia ho Komandante ninia inisiativa. Maibé, ha’u hanoin, iha Polícia nia larab mós presiza iha segredu tanba membru polísia nian sira balun mós envolve iha grupu sira-ne’e no dala barak sira la imparsiál iha sira-nia atuasaun. Ida fali tan maka se grupu sira-ne’e Governu legaliza ona, entaun ba buka kaer maka sira-nia lider sira atu nune’e sira bele hanorin sira-nia lider sira.

Leave a Reply

iklan
error: Content is protected !!