iklan

NASIONÁL, KAPITÁL

MAPKOMS-Ministériu relevante fó solusaun ba instalasaun futuru edifisiu PN

MAPKOMS-Ministériu relevante fó solusaun ba instalasaun futuru edifisiu PN

Ministru Asuntu Parlamentár no Komunikasaun Sosiál, Francisco Jerónimo. Imajen TATOLI/Francisco Sony.

DILI, 29 setembru 2022 (TATOLI)—Governu liuhosi Ministériu Asuntu Parlamentár no Komunikasaun Sosiál (MAPKOMS), kinta (28/09) ne’e, halo enkontru ho Ministériu relevante atu konsolida oinsá fó solusaun ba pedidu hosi Parlamentu Nasionál (PN) kona-ba rai hodi halo instalasaun ba futuru edifisiu Parlamentu Nasionál.

Notísia Relevante: Governu prepara rai ektare 10 iha Hera harii edifísiu foun PN

“Reuniaun ohin ne’e atu konsolida, ministériu sira hotu-hotu oinsá atu haree no fó solusaun ba pedidu hosi Parlamentu Nasionál relasiona ho rai atu halo instalasaun futuru edifisiu Parlamentu Nasionál. Tanba, tuir informasaun no tuir buat ne’ebé Parlamentu deside iha Hera, entaun ohin ami halo diskusaun posibilidade saida mak Governu halo, atu nune’e bele halo atribuisaun ba Parlamentu Nasionál. Maibé iha buat ida mak ohin levanta iha ne’e, tanba Ministériu Planeamentu Ordenamentu Territóriál (MPO) mós halo plánu no iha ona, oinsá mak sidade iha Dili ne’e labele iha Dili laran de’it, maibé sei hasai mós ba iha ne’ebá. Entaun sira fahe ba parte hirak ne’e, nune’e ohin ami halo diskusaun hodi haree hela, atu nune’e bele fó sulusaun no mós sei ko’alia ho Prezidente Parlamentu atu di’ak mak ida-ne’ebé,” Ministru Asuntu Parlamentár no Komunikasaun Sosiál (MAPKOMS), Francisco Martins da Costa Pereira Jerónimo, hateten ba jornalista sira, bainhira finaliza enkontru ho Ministériu relevante iha Palásiu Governu, Dili, sesta ne’e.

Tanba ne’e, nia dehan, sira sei hato’o alternativa ba Prezidente Parlamentu Nasionál, Aniceto Longuinhos Guterres Lopes, hodi nune’e nia mak hili ida-ne’ebé mak di’ak, tanba fatin ne’ebé atu estabelese edifisiu foun ba Parlamentu Nasionál (PN), ne’ebé mak parlamentu sira deside iha Hera.

“Fatin fiksu ne’ebé Parlamentu sira deside mak Hera, maibé téknikamente ami haree iha buat balun, maibé orsida ami sei aprezenta ba Prezidente Parlamentu nia hanoin oinsá. Se kontinua nafatin iha Hera, ami laiha problema no Governu nafatin haree saida mak bele halo,” nia dehan.

Iha enkontru ne’e envolve mós ministériu relevante sira hanesan Ministério Justisa, tanba ne’ebá iha kadastrál ne’ebé levantamentu kona-ba rai, envolvimentu Ministériu Obras Públikas (MOP), tanba sira mak ko’alia kona-ba Enjiñeiru.

“Ministériu Ordenamentu Territoriál, tanba sira ko’alia kona-ba oinsá maka ordena rai ne’e hodi had’ia no envolve mós Meiu Ambiente, tanba sira sei haree atu halo estudu ambientál impaktu hosi projetu ne’e. Hosi ne’e envolve mós parte Agrikultura, tanba ko’alia kona-ba ai-horis no ai-han sira ne’ebé iha rai leten,” nia esplika.

Maske nune’e, planu hosi Parlamentu Nasional nian katak iha 2023, pelumenus iha ona lansamentu primeira pedra ba instalasaun edifisiu futuru Parlamentu Nasionál maibé Governu iha kompromisu nafatin katak antes dezembru Governu hakarak atu konklui ona prosesu ne’e.

Fatin instalasaun ba edifisiu futuru Parlamentu Nasionál ne’ebé Parlamentu hili mak Hera, maibé Governu nia opsaun seluk mak Metinaro sei opsaun ne’e bainhira PN konkorda.

Kona-ba totál orsamentu hira mak prevee ba instalasaun futuru edisifiu ne’e, Sekretáriu Jerál Adjuntu Parlamentu Nasionál (PN), João Rui Amaral, afirma orsamentu seidauk iha atu prevee ba instalasaun futuru edifisiu ne’e.

“Tanba ita ko’alia ne’e kona-ba rai lai, se rai kuandu definidu ona mak ita foin halo ita-nia planu sira-ne’e. Agora rai laiha, ita atu aloka orsamentu ne’e ba saida, tanba ne’e presiza iha rai lai. Agora rai ne’e mak foin ami ko’alia hela, maibé ami sei lori fali mai reuniaun segunda volta nian,” nia dehan.

Jornalista : Nelia Fernandes

Editor      : Cancio Ximenes

iklan
iklan

Leave a Reply

iklan
error: Content is protected !!