UNTL prodús tán baixarelatu 428 iha Bobonaro
BOBONARO, 03 outubru 2022 (TATOLI) — Universidade Nasionál Timor Lorosa’e (UNTL), segunda ne’e realisa serimónia graduasaun etapa dalimak hodi prodús tán graduadu nível baixarelatu edukasaun na’in-428 iha munisípiu Bobonaro ba tinan akadémika 2022.
Ministru Ensinu Superiór, Siénsia no Kultura, Longuinhos dos Santos, esplika, graduasaun ne’e sai hanesan momentu importante ida ba instituisaun ensinu superiór. Maibé graduasaun ne’e sai espesiál liu tanba haree ho profesór sira Ministériu Edukasaun nian ne’ebé hetan asesu ba formasaun graduadu (baxarelatu) atu sira bele hetan susesu iha karreira dosente.
Tanba serimónia ne’e sai hanesan akontesimentu ida-ne’ebé importante tebes ba komunidade akadémika iha Timor-Leste.
Notísia relevante: Estudante finalista UNTL 627 simu graduasaun
Longuinhos akresenta, VIII Governu Konstitusionál nian entende katak komponente ida hosi komponente sira ne’ebé estruturante liu iha misaun universidade públika nian mak atu kualifika sistema nasionál ensinu nian, liuliu nível pré-eskolár, primáriu no sekundáriu, atubele halo ida-ne’e efikás liután, liuhusi formasaun inisiál no kontínua ba profesór sira.
Tanba misaun ne’e sai nu’udar kondisaun esensiál atu sistema edukativu Timor nian bele hametin no alkansa sistema edukativu foun sira ho kualidade.
“Serimónia graduasaun ne’e signifika katak UNTL no INFORDEPE, liuhusi kualifikasaun dosente sira nian ne’ebé hala’ o hela serbisu iha munisípiu oinoin iha país nian, fó ona kontributu importante ida atu Timor-Leste bele hala’o objetivu sira hosi dezenvolvimentu sustentável, ne’ebé mak asegura edukasaun ho kualidade ba labarik no foin sa’e sira hotu,” nia hateten iha intervensaun.
“Ha’u hatene katak imi la fasil atu serbisu hanesan profesór iha eskola sira no sira estuda mós iha tempu hanesan. Tanba ne’e, ha’u hakarak hato’o parabéns ba imi. Ha’u mós hakarak hato’o felisitasaun ba graduadu sira-nia família no belun sira, tanba vitória ne’ebé ohin imi hetan ho graduasaun ne’e la’ós de’it imi nian, maibé sira mós iha apoiu hosi imi-nia familia no belun sira,” Longuinhos hateten.
Reitór UNTL, João Soares Martins, sente kontente no orgulu tanba profesór iha Bobonaro na’in- 428 kedas mak simu graduasaun, ne’e duni nia espera graduadu hirak-ne’e bele kontribui ba melloramentu kualidade edukasaun bázika.
“Hau hato’o parabéns ba graduadu sira, ha’u-nia mensajen maka ne’e labele para de’it iha ne’e, kontinua estuda nafatin, hakarak ba kursu bele ba kursu tán,” nia fó hanoin.
Partisipa iha serimónia graduasaun ne’e, Prezidente INFORDEPE, Maunel Gomes Araújo, Prezidente Autoridade Munisípiu Bobonaro, Ernesto de Oliveira Barreto, Diretór Edukasaun sira hosi nasionál, munisípiu, administradór postu administrativu Maliana, TomÁs Laco-loe, autoridade sivíl, militár, família no konvidadu sira.
Notísia relevante: INFORDEPE no UNTL hahú ajusta kalendáriu graduasaun profesór baxarelatu 2.576
Jornalista: Sérgio da Cruz
Editór: Evaristo Soares Martins
