Aviaun ambulánsia transporta ona pasiente 3.000 hosi munisípiu mai Dili

DILI, 05 outubru 2022 (TATOLI)— Hahú hosi tinan 2007 to’o 2022, aviaun ambulánsia ka Mission Aviation Fellowship (MAF), konsege transporta ona pasiente 3.000-resin hosi munisípiu mai Hospitál Nasionál Guido Valadares (HNGV) hodi halo tratamentu saúde.
“MAF disponibiliza aviaun ambulánsia ida atu ajuda Governu transporta urjente pasiente sira husi munisípiu mai HNGV, ” hateten Diretor Nasionál MAF, Nick Hitting, ba Agência TATOLI iha Aeroportu Nicolau Lobato-Comoro-Dili, kuarta ne’e.
Ministériu Saúde no Mission Aviation Fellowship (MAF) asina akordu kooperasaun ida iha tinan 2007 atu ajuda Governu hodi trasnporta urjente pasiente ho kondisaun krítiku mai iha HNGV hodi hetan tratamentu médiku.
Diretór ne’e esplika misaun MAF nian iha Timor-Leste mak atu fó apoiu umanitária ba ema sira ne’ebé presiza tratamentu médiku iha área remota sira.
“Servisu ne’e, MAF la buka lukru tanba doador internasionál sira disponibiliza anualmente rihun $400,” nia afirma.
Hafoin Estadu emerjénsia tanba situasaun COVID-19, aviaun ambulánsia konsege suspende voo ka operasaun, maibé hahú marsu 2021 to’o agora, hahú fali operasaun normál hodi tula pasiente husi munisípiu mai HNGV.
Aviaun ambulánsia ne’e ho kapasidade tula ema na’in neen, kompostu hosi pasiente na’in rua no akonpaña ho familia na’in-rua, inklui médiku ida no Enfermeiru ida.
Notísia relevante: Aviaun ambulánsia kontinua halo operasaun normál
Jornalista: Felicidade Ximenes
Editór : Florencio Miranda Ximenes

