CEEF Bobonaro selebra akordu ho grupu 16 asesu fundu rotativa

BOBONARO, 06 outubru 2022 (TATOLI) — Sentru Empoderamentu Ekonomia Feto (CEEF, sigla portugés) munisípiu Bobonaro, kinta ne’e selebra akordu ho grupu 16 sai benefisiáriu atu asesu fundu rotativa mai hosi Sekretaria Estadu Ingualdade no Inkluzaun (SEII).

Totál orsamentu liuhosi fundu tranferénsia públika ne’ebé SEII apoia ba grupu benefísiáriu sira ne’e hamutuk $27,000.00 maibé kada grupu sei hetan montante la hanesan grupu balu hetan $1.000, $1.500 to’o $2.000.

Grupu hirak-ne’e sai benefisiáriu ba programa ne’e mak hanesan Grupu Feto Mallora Moris Dame ho nia atividade hakiak Karau, Purugua Moris Foun hakiak no fa’an Karau, Feto fila-liman Futatas Loke kioske.

Nune’e mós Feto Rurál Kalohan loke kioske, Feto Moris Diak hakiak Manu,  Feto Mota-Boek loke kioske, Feto aldeia Mape hakiak Manu, Feto Altu Lebo hakiak Bibi.

Notísia relevante: Autoridade oferese materiál ba grupu feto Oé-Cusse mellora kualidade soru tais

Enkuantu grupu Feto Soru Tais ho atividade soru Tais, grupu Feto Mudansa Loke kioske, Goku hakiak manu Timor, HamriIk Mesak atividade agrikultura Integradu, grupu Halif agrikultura Integradu, Maniki agrikultura intégradu, Feto loke kioske grupu Feto Gi-Matan Soilesu ho aktividade hakiak fahi.

Purtantu, bazea ba artigu 02 númeru 03 dekretu governu numeru 1/2009, loron 18 fulan-fevereiru katak ezekusaun subvensaun públika bele halo liuhosi kontratu ho entidade públika ka privadu.

Nune’e Membru Asosiasaun Grupu Feto Maulora Moris Dame sai benefisiáriu ba programa hakbiit ekonomia feto ne’ebé implementa hosi Sekretaria Estadu Igualdade no Inkluzaun no iha tinan sei tranfere osan ho montante rihun $2, ne’ebé tuir kontratu sei tranfere fila-fali ho montante hanesan ba asosiasaun iha tinan 2024 hodi fahe  fali ba komunidade ka grupu seluk  iha futuru bazea ba sistema rotativu apoiu fundu finanseiru hosi asosiasaun sira.

Sistema rotativu ba lukru halo liuhosi subensaun públika hanesan makanismu ida relavnte atu fó oportunidade boot liután no promove impaktu boot liután iha área  hakbiit ekonómia feto sira no asegura númeru benefísiáriu hosi prinsípiu sustentablidade apoiu nian.

Mekanismu ba subvensaun ne’ebé entrega hosi entidade públika ho pozisaun atu entrega lukru ho valór hanesan ba grupu seluk iha natureza nu’udar rezerva doasaun nian ne’ebé determina benefísiu parte daruak tuir saida mak regula ona iha artigu 892 kódigu sivíl.

Diretora Nasionál Dezenvolvimentu Jéneru iha SEI, Francisca de Sousa, esplika, antes ne’e iha grupu sira-ne’ebé asesu ona fundu iha tinan kotuk, iha balu enrega fali orsamentu tanba durasaun tempu akordu tinan ida de’it.

Haree ba difikuldade hirak-ne’e maka tinan ida ne’e SEII hamosu fali makanismu rotativa prolonga tán tempu ba tinan rua nune’e grupu sira iha bele iha tempu buka rendimentu hodi halibur nafatin kapitál ne’ebé simu atubele devolve fali osan ne’e ba sentru asosiasaun.

“Fundu ne’e agora mai ho mekanismu rotativu,oinsá mak ita atu eduka grupu benefisiáriu kiik sira atu iha seriedade ba halo negósiu tanba tinan hirak liubá ita fó fundu laiha mekanismu sira, la fó fila fali,” nia informa ba jornalista sira iha salaun administrasaun munisípiu Bobonaro.

Hafoin selebra akrodu, SEII sei halo tranferénsia orsamentu ba konta bankária kada grupu atu nune’e bele hahú ona sira-nia atividade ne’ebé submete iha proposta, maibé molok hahú semana oin ekipa ida sei fó formasaun ba benefisiáriu sira.

“Ha’u-nia mensajen katak ida-ne’e nu’udar oportunidade ne’ebé ke di’ak, tanba tempu ida agora ita atu husu osan $500 de’it mós ema la fó, entaun governu ajuda liuhosi fundu rotativu, jere didi’ak ba,” nia fó hanoin ba grupu benefisiáriu sira.

Sekretáriu Autóridade Munisípiu Bobonaro, João Fátima do Carmo, agradese ba SEII ne’ebé bele iha inisitiva di’ak apoia ne’e, tanba liuhosi programa ne’e bele reforsa tán serbisu hanesan ne’e kabe ba kompeténsia autoridade munisípiu nian.

“Ami laiha kbiit atu responde direita, maibé ho tulun hosi governu sentrál bele hakmaan netik todan ne’ebé ami sente, tanba ne’e husu ba benefisiáriu sira, atu utiliza orsamentu ne’e tuir ninia matadalan ne’ebé ita-boot sira simu tanba osan ne’e estadu nian, uza tuir regra,” nia apela.

Benefisiáriu hosi grupu Guko, Suzana Brangança,sente kontente bele hetan oportunidade asesu ba fundu ne’e, maske hein kleur ona.

“Aaradese tebes ba goveru tanba tulun ona ami komunidade sira, ha’u-nia haree programa ne’e di’ak tebes tanba bele ajuda ona ami atu badinas serbisu, ha’u fiar katak osan ne’e sei uza ho didi’ak,” nia promete.

Notísia relevante: Grupu empoderamentu ekonomia feto 384 rejistu ona iha SEII

Jornalista: Sérgio da Cruz

Editór: Evaristo Soares Martins