DILI, 06 outubru 2022 (TATOLI)–Asosiasaun Tane Konsumidór, kinta ne’e, halo audiénsia ho Prezidente Repúblika (PR), José Ramos Horta, hodi relata sira-nia relatóriu serbisu defeza konsumidór durante tinan-rua (2021-2022).
Prezidente Tane Konsumidór, António Ramos da Silva ‘Naikoli’, hateten, objetivu aprezenta relatóriu serbisu tanba Xefe Estadu nu’udar Prezidente Onoráriu ba Tane Konsumidór no relatóriu ne’e rasik sira-nia parte serbisu hamutuk ho Uniaun Europeia.
“Relatóriu ne’ebé ita aprezenta ne’e ko’alia kona-ba atividade durante tinan-rua, durante períodu pandemia COVID-19, tanba ita-nia ezisténsia ne’e fó nafatin garante asesu informasaun ba konsumidór sira no fó advokásia ba konsumidór inklui atende konsumidór sira-nia problema,” Prezidente Tane Konsumidór hateten iha Palásiu Prezidensiál Bairru-Pité.
Notísia relevante: TANE Konsumidór introdús peskiza folin nesesidade bázika iha loja 21
Aleinde ne’e, Tane Konsumidór tenke relata serbisu ba Prezidente Repúblika tanba nu’udar Xefe Estadu atu garante ba funsionamentu Estadu no Tane Konsumidór rasik serbisu tuir lei ne’ebé impmenta iha dekretu-lei númeru 8/2016 08 jullu kona-ba protesaun konsumidór sira-nia no iha lei defeza konsumidór nia mós hakerek kona-ba devér jerál Estadu.
Biban ne’e, hato’o mós serbisu kona-ba kolaborasaun asosiasaun ne’e ho Governu, liuliu atu proteje konsumidór nia direitu no kona-ba lei sira ne’ebé falta tan, ne’ebé aprezenta ona ba Governu liuhosi Prezidénsia Konsellu Ministru kona-ba lei sira ne’ebé presiza regulariza no proteje konsumidór inklui devér Estadu apoiu ba organizasaun defeza konsumidór.
Nia dehan, iha maiu tinan ne’e, Tane Konsumidór aprezenta ona relatóriu ba Governu no aprezenta kona-ba diploma lejislativa sira atu projete konsumidór.
“Tanba iha lei konsumidór nian ne’e, prinsípiu mak proteje konsumidór, seluk projete interese ekonómiku Estadu nian. Ami-nia papél mak oinsá garante konsumidór sira no fó informasaun kona-ba direitu no prinsipiu direitu, enkuantu konsumidór sira hatene sira-nia direitu no devér atividade ekonómiku ne’e bele la’o di’ak no fó benifísiu ba hotu-hotu,” António tenik.
Xefe Estadu agradese ba serbisu Tane Konsumidór ne’ebé bele fó benefísiu ba konsumidór sira.
Planu prioridade Tane Konsumidór ba tinan 2023 mak sei kontinua halo asaun sosiál ba direitu no konsumidór, formasaun ba konsumidór sira, no fó formasaun tama iha eskola sira no fatin seluk tan.
Jornalista : Arminda Fonseca
Editora : Julia Chatarina
