DILI, 14 outubru 2022 (TATOLI)— Polísia Nasionál Timor-Leste (PNTL) prevee milliaun $43-resin iha Orsamentu Jerál Estadu (OJE) 2023 hodi finansia programa tolu.
“Totál orsamanentu polisia ninian ne’ebé ohin ami deskute maka iha milliaun $43-resin hodi finansia programa tolu, hanesan seguransa nasionál, boa Governasaun, iguldade jenéru no inkluzaun”, hateten Vise Ministru Interiór, António Armindo, ba jornalista sira hafoin audénsia públika kona-ba OJE 2023 ho Komisaun B, iha Parlamentu Nasionál, sesta ne’e.
Hosi total orsamentu milliaun $43 ne’e, milliaun $31 aloka ba saláriu no vensimentu PNTL, no aloka milliaun $3 ba atividade polísia nian hodi asegura eventu eleisaun parlamentár tinan oin hanesan serbisu operasaun PNTL nian inklui fornesimentu mina ba viatura PNTL inklui reparasaun veíkulu no ró PNTL no prevee rihun $20 ba programa rekorrente sira hanesan ba sensibilizasaun.
Hosi milliaun $3 ne’e, nia dehan sei halo akizasaun mós ba ekipamentu hanesan gás, estik, no rádio komunikasaun.
Iha 2023, PNTL mós hadi’a infra-estrutura sira hanesan eskuadra PNTL iha territóriu nasionál ne’ebé daudaun nia kondisaun aat ona, inklui instalasaun torre ba komunikasaun ba PNTL ne’ebé sei halo iha Rejiaun Administratva Espesiál Oé-Cusse no Ambeno (RAEOA), postu adminiatrativu Lolotoe, munisípiu Bobonaro, Kutulau, postu administrativu Bazartete, munisípiu Liquiça.
Iha fatin hanesan, Prezidente Komisaun B ne’ebé trata ba asuntu Seguransa, Defeza no Negósiu Estranjeiru, José Agostinho Siqueira “Somotxo hateten orsamentu PNTL tinan oin iha milliaun $43, orsamentu ne’e korresponde no finansia nesesidade PNTL nian.
“Iha orsamentu PNTL ba tinan oin bele sosa ekipamentu sira hodi ajuda serbisu PNTL nian no hadi’a infra-estrutura PNTL nian ne’ebé balun hahú aat, liuliu Eskudra polísia sira no sosa karreta pezadu sira nune’e apoia Polisia Tránzitu nian serbisu iha tereñu,” katak.
Jornalista: Natalino Costa
Editór : Florencio Miranda Ximenes
