SEKOMS fó apresiasaun ba grupu feto potensiál “Hakmatek” iha maubisse
AINARO, 14 outubru 2022 (TATOLI)—Sekretáriu Estadu Komunikasaun Sosiál (SEKOMS), Merício dos Reis Akara, sesta ne’e, fó apresiasaun ba grupu feto potensiál “Hakmetek” iha aldeia Liketei, suku Maubisse, postu administrativu Maubisse, munisípiu Ainaro tanba konsege kria atividade hortikultura.
“Ha’u hakarak fó apresiasaun de’it katak ita-boot sira konsega halo no kria grupu kreatividade, entaun Sekretáriu Estadu Komunikasaun Sosiál atu fó de’it kanál atu ita-boot sira bele sai kuiñesidu no ema bele hatene liután. Tanba matenek no kreatividade lokál ne’ebé mak ita-boot sira iha, hanesan bele organiza malu no kuda estrobery (morango),” Merício dos Reis Akara hateten iha nia diskursu serimónia entrega sertifikadu ba grupu feto potensiál “Hakmetek” na’in-rua (2) iha aldeia Liketei, suku Maubisse, postu administrativu Maubisse, munisípiu Ainaro.
Administradór Postu Administrativu Maubisse, Cláudino Mendonsa, agradese ba SEKOMS tanba bele vizita no haree grupu feto potensiál “Hakmatek” iha aldeia Liketei, suku Maubisse, tanba ne’e nia parte fó korajen no motiva nafatin ba grupu feto potensiál ne’e atu eziste nafatin hodi hala’o atividade hortikultura.
“Tanba, imi halibur malu hamutuk no mosu ideia foun, halo oinsá bele hala’o imi-nia programa ne’e atu dezenvolve an nafatin, nune’e ba oin feto potensiál iha aldeia Liketei, uku Maubisse Villa, postu administrativu Maubisse ne’e eziste nafatin ba oin,” nia dehan.
Koordenadór Grupu Feto Potensiál Hakmatek, Manuel Pereira de Araújo, sente orgullu tanba grupu feto ne’e, foin hetan sertifikadu ida iha ne’e.
“Ha’u hanesan xefe grupu, ha’u orgullu tanba ha’u-nia membru nain rua (2) kona-ba feto potensiál sira bele hetan sertifikadu,” nia dehan.
Entretantu, tuir informasaun hosi Koordenadór Grupu Feto Potensiál Hakmatek, Manuel Pereira de Araújo, informa grupu ne’e harii iha tinan 2021 to’o agora, ho totál membru hamutuk ema-na’in-60, ne’ebé kompostu hosi feto no mane ne’ebé halo atividade kona-ba hortikultura hanesan kuda estroubery, kuda repollu, modo-mutin, modo-metan, tomate no liis-mean no liis-mutin.
Jornalista : Nelia Fernandes
Editór : Cancio Ximenes
