DILI, 17 outubru 2022 (TATOLI)–Ministériu Edukasaun Juventude no Desportu (MEJD) realiza ona pagamentu 50% faze daruak ba projetu komunitária hamutuk 151 ne’ebé maka hala’o iha territóriu nasionál.
Ministru Armindo Maia hateten entre projetu 202 ne’ebé maka VIII governu konstitusionál kria iha tinan ida ne’e, ministériu konsege halo ona pagamentu faze daruak nian ba projetu hamutuk 151 ne’ebé konsidera atinje ona 74,7%.
“Ita halo ona pagamentu faze daruak 50% ba 151 projetu entre projetu hamutuk 202. Hosi projetu 151 ne’e koresponde ba 74,7% ida ne’e maka prosesu pagamentu segundu faze ne’ebé ita halo ona”, Armindo Maia hato’o informasaun ne’e ba jornalista sira iha salaun enkontru MEJD Vila Verde, segunda ne’e.
Tuir membru governu ne’e katak alende projetu 151 ne’ebé hetan ona pagamentu iha mós projetu komunitária hamutuk 21 maka prepara ona atu tama ba prosesu verifikasaun ne’ebé sei halo hosi Ajénsia Dezenvolvimentu Nasionál (ADN). Depois sei rekomenda ba ministériu hodi aselera prosesu pagamentu ba faze datolu.
Governante ne’e mós haktuir projetu 21 ne’ebé la’o daudaun ninia fundus mai hosi kapitál dezenvolvimentu, projetu ne’e rasik iha ona progresu ne’ebé di’ak tanba atinje ona kuaze 50%.
Nune’e mós iha tan projetu konstrusaun ba eskola CAFE tolu ne’ebé ninia orsamentu mai hosi fundu infraestrutura. Projetu sira ne’e hetan konsiderasaun katak iha eskola CAFÉ Suai maka hatudu ona progresu di’ak tanba atinje ona 20% maibé eskola rua seluk sei iha pursentu ne’ebé ki’ik liu.
Entretantu hosi projetu komunitária ein-jerál iha faze dahuluk nian konsidera sai paradu tiha durante fulan rua-tolu tanba iha kestaun legál ho ADN. tuir lei kuandu projetu hotu ne’ebé ninia kustu ka orsamentu liu rihun $50 tenke hetan verifikasaun hosi ADN. Depois maka ADN sei halo rekomenda hodi halo prosesu pagamentu bazeia ba pursentazen ne’ebé iha.
Ho nune’e maka projetu komunitária faze dahuluk ne’e sai paradu tiha. Maibé depois MEJD ho ADN halo tiha akordu ruma ADN kontinua hala’o ninia kna’ar hodi verifika progresu ba konstrusaun fíziku hosi projetu sira, depois maka hato’o ba Ministériu hodi halo pagamentu tuir saida maka Ministériu haree katak bele.
Notísia relevante: MEJD garante projetu komunitáriu konstrusaun infraestrutura eskola sei inaugura iha dezembru
Jornalista : Tomé Amado
Editora : Rita Almeida
