Xefe família 29 iha Lour la asesu Cesta Bázika
BOBONARO, 18 outubru 2022 (TATOLI)— Xefe suku Lour, postu administrativu Bobonaro, munisípiu Bobonaro, Miguel Lopez Gomes, informa xefe família hamutuk 29 iha suku refere la asesu distribuisaun Cesta Bázika.
Nia dehan, tuir lista ne’ebé Ministériu Administrasaun Estatál haruka ba suku, xefe família hirak-ne’e nia naran iha hotu kedas, maibé iha momentu distribuisaun lista hosi Ministériu Turizmu, Komérsiu no Indústria (MTKI) naran laiha fali.
Notísia relevante: Abitante Ritabou kestiona kompañia kahur produtu ‘fuhuk’ iha Cesta Bázika
“Ha’u-nia suku simu iha Cesta Bázika iha loron 21 setembru maibé ami iha dadus reklamante 29, sira seluk simu hotu ona, iha xefe família 29 mak la simu, tanba lista Ministériu Komérsiu Indústria lori sira-nia lista, ho nune’e mak la apár ho lista ami-nia Ministériu Administrasaun Estatál haruka,” nia informa ba Agência Tatoli, iha postu administrativu Bobonaro, tersa ne’e.
Miguel haktuir, iha momentu distribuisaun xefe família hirak-ne’e nia naran inklui iha lista adisionál ne’ebé ekipa MTCI munisípiu Bobonaro lori maibé la autoriza kompañia atu distribui entaun hamosu diskusaun ba malu.
Xefe suku Miguel Lopez Gomes sente triste no lamenta tanba ninia komunidade hirak-ne’e naran rejistu ona iha livru suku nian, maibé la konsege sai benefisiáriu ba programa Cesta Bázika.
“Ha’u atu klarifika de’it, lista sira-ne’e la’ós inventadu, sira-ne’e rejistu duni, agora tanba saida mak sira labele hetan fali. Ida-ne’e ha’u hanesan autoridade lokál sente la justu ona ba komunidade sira,” nia hateten.
Lideransa komunutária ne’e husu munistériu implementadór sira atu nafatin konsidera família hirak-ne’e nune’e bele simu sira-nia direitu iha tempu sira tuir mai.
“Sé lae ami mak todan, tanba agora sira fó presaun fali mai ami, dehan xefe suku sira mak halo hanesan mak ami la konsege hetan ne’e,” Miguel haklaken.
Maske nune’e xefe suku ne’e agradese ba governu tanba kontinua iha komitmentu implementa programa Cesta Bázika, hodi ajuda komunidade sira ba nesesidade família.
Nia konsidera programa ne’e iha vantajen di’ak tanba governu halo intervensaun ida ké simples maibé ninia benefísiu ne’e boot tebes.
“Programa ne’e di’ak, tanba obriga komunidade sira esforsu sira nia-aan hodi fó vontade tomak ba sira, atu nune’e sira bele haka’as-aan ba iha atividade setór agrikultura ninian, nune’e sira-nia sasán sira-ne’e bele folin,” Miguel dehan.
Suku Lour iha aldeia haat mak hanesan Tazgolo, Helikei, Olo-Olo no aldeia Galitas ho totál populasaun 1,440 komposta hosi feto 725 no mane 725 mai hosi uma-kain 200 ho nia xefe família 315.
Notísia relevante: MTKI konklui distribuisaun produtu Cesta Bázika iha suku Lahomea Bobonaro
Jornalista : Sérgio da Cruz
Editór : Evaristo Soares Martins
