DILI, 21 outubru 2022 (TATOLI) — Diretór Ezekutivu, Servisu Rejistu no Verifikasaun Emprezariál, Instututu Públiku (SERVE,I.P), Florência Sanches, hateten janeiru to’o setembru 2022 rejista kompañia sira ne’ebé halo alterasaun ba dokumentu hamutuk rihun hitu-resin.
Nia dehan, ko’alia kona-ba alterasaun bá dokumentu ne’e fasilita setór privadu sira hakarak halo mudansa ba sira-nia atividade ka hela fatin, ezemplu uluk nia prodúz bee agora hakarak altera fali ba prodúz sapatu no fatin karik uluk nia loke kios iha Dili, agora hakarak muda fali ba fatin seluk ka munisípiu.
“Tinan ne’e ita halo alterasaun ba ita-nia setór privadu sira ne’e hamutuk rihun hitu-resin, hosi janeiru to’o setembru, tanba kada fulan ita simu dokumentu ne’ebé halo alterasaun rihun ida resin, ida ne’e pasu pozitivu ba ita”, Florência Sanches, hateten ba Agência Tatoli, iha nia knar-fatin, Hudi-Laran, sesta ne’e.
Diretór revela, kompañia ka setór privadu ne’ebé halo alterasaun ba domunetu ne’e di’ak tebes ba Governu tanba liuhosi alterasaun ne’e daudaun setór privadu maioria uluk mate agora moris fali.
“Uluk setór privadu sira atu halo alterasaun ba dokumentu ne’e, selu $100,00 maibé agora ita hatun fali ba $10,00 entaun setór privadu maioria mak moris fali, nia vantajen ba kompañia rasik maibé mós ba Estadu tanba ninia kompañia moris lukru 10% ba Estadu”, nia hateten.
Reseita ne’ebé ita hetan hosi alterasaun dokumentu ne’e hamutuk $167,000 maibé reseita ne’e sura hosi janeiru to’o mai agostu 2022.
Jornalista : Arminda Fonseca
Editór : Zezito Silva
