OJE 2022: CNC foin ezekuta 39% iha trimestre datoluk
DILI, 24 outubru 2022 (TATOLI)—Diretór Ezekutivu Centro Nacional Chega (CNC), Hugo Maria Fernandes, informa iha trimestre datoluk (jullu-setembru) tinan ne’e CNC foin ezekuta verba Orsamentu Jerál Estadu (OJE) 2022 atinji ona 39 % ne’ebé ekivalensia ho osan hamutuk $2,537,331,00.
Notísia Relevante: OJE 2022: CNC ezekuta ona 33% iha trimestre daruak
“To’o iha trimestre datoluk, CNC foin atinje 39% ho osan millaun $2,5,” Hugo Maria Fernandes hateten ba jornalista sira, iha salaun CNC Antigu Komarka, Balide, Dili, segunda ne’e.
Ezekusaun trimestre datoluk ne’e iha atrazu barak liu-liu ba projetu konstrusaun sentru arkivu tanba orsamentu alokasaun boot ba projetu konstrusaun ne’e.
Tanba, nia dehan, iha prosesu dezeña to’o hetan aprovasaun la’ós CNC mesak mak halo maibé tenke lori ba Ministériu Obra Públiku no tenke hetan fali aprovasaun hosi AND ne’e mak han tempu.
“Tanba, ami-nia planu loloos to’o iha juñu maibé foin hetan aprovasaun finál iha outubru hosi ADN no Obra Públiku, entaun ida-ne’e mak halo atrazu ba ezekusaun orsamentu ida boot, liu-liu iha aspeitu konstrusaun sentru arkivu,” nia esplika.
Maske nune’e, hosi ezekusaun 39% ne’e, CNC utiliza ba halo atividade sira-ne’ebé relasaun ho programa boot CNC nian, hanesan komemorasaun eventu istóriku, semináriu no halo atribuisaun ba Asosiasaun Vítima no Asosiasaun Eis-Prizioneiru polítiku.
Aliende ne’e, CNC iha planu atu harii uma memoria esperansa lima (5) no mós atividade mapeamentu sítiu istóriku ne’e kontinua halo no atribuisaun apoiu ba muzeu memoriál tolu (3), ne’ebé CNC harii ona hanesan iha tinan kotuk harii ona muzeu rua (2) no tinan ida-ne’e muzeu ida (1).
Aleinde ne’e, atividade ikus liu ne’ebé CNC halo mak agora apoiu hela komunidade Balibo atu harii memoriál ida iha Balibo, ne’ebé iha komemorasaun Loron Nasionál Liberdade Imprensa iha 16 outubru ne’e CNC mós lansa memoriál ida iha ne’ebá no to’o iha tinan ida-ne’e nia rohan ne’e ninia ezekusaun ne’e bele sa’e to’o 75%.
Notísia Relevante: https://tatoli.tl/2022/07/07/oje-2022-cnc-ezekuta-ona-33-iha-trimestre-daruak/
Jornalista : Nelia Fernandes
Editór : Cancio Ximenes
