DILI, 25 outubru 2022 (TATOLI)—Ministériu Turizmu Komérsiu no Indústria (MTKI), tersa ne’e, selebra kontratu ho benefisiáriu 664 hosi fundu planu rekuperasaun ekonómika ba mikro pekena no média empreza ba atividade turizmu no ospitalidade.
Ministru Turizmu Komérsiu no Indústria, José Lucas do Carmo da Silva, hateten, planu rekuperasaun ekonómika nu’udar atividade sosiu-ekonómiku ne’ebé VIII Governu Konstitusionál inisia hodi hatan ba situasaun COVID-19 ne’ebé afeta ba mundu tomak inklui kalamidade iha rai-laran ne’ebé fó estragu no prejuizu ba operadór turístiku no atividade turizmu sira.
“Objetivu jerál planu rekupresaun ekonómika ne’e maka atu normaliza no rekupera atividade ekonómika turizmu sira iha rai-laran inklui mellora rendimentu operadór ekonómiku turizmu sira, estimula komunidade ne’ebé iha talentu no kreatividade hodi kria negósiu iha área turizmu no ospitalidade, nune’e bele hadi’a kreximentu ekonómiku iha rai-laran,” Ministru relata iha serimónia selebrasaun kontratu, iha edifísiu MTKI, Farol, tersa ne’e.
Notísia relevante: Empreza 3.984 eziste foun hafoin Governu introdús medida rekuperasaun ekonómika
Benefisiáriu 664 ne’ebé asina kontratu kompostu hosi grupu arzenatu 143 hodi hala’o atividade sitíu turístiku 21 no grupu 500 ba atividade street food.
Governante ne’e konsidera, rekuperasaun ekonómika liuhosi turizmu importante tebes tanba durante pandemia Estadu Timor-Leste dekreta Estadu Emerjénsia hodi limita movimentu públiku.
“Ho situasaun ne’e maka Ministériu Turizmu Komérsiu no Indústria prevee orsamentu planu rekuperasaun ekonómika liuhosi fundu apoiu mikro pekena média empreza turizmu ba Diresaun Nasionál Dezenvolvimentu Turístiku (DNDT) ho montante $ 270.000 no Diresaun Nasionál Empreendimentu, Atividade no Produtu Turístiku (DNEAPT) ho montante $1.795.000.
Apoiu fundu ne’e direita hosi Diresaun Jerál Turizmu Gabinete Vise-Ministra Turizmu Komunitáriu no Kulturál hodi rekupera no normaliza atividade setór turizmu iha munisípiu 12 inklui Rejiaun Adminisnistrativa Espesiál Oé-cusse Ambeno (RAEOA).
Iha fatin hanesan, Vise-Ministra Turizmu Komunitáriu no Kulturál, Inácia da Conceição, husu ba benefisiáriu sira atu partisipa ativu liután ba prosesu dezenvolvementu rekuperasaun ekonómika.
“Husu ita-boot sira atu iha akuntabilidade no responsabilidade ba fundu ne’e tanba ita iha regra relasiona ho fundu transferénsia públika. Tanba ne’e hatoman-an atu ita hotu satisfaz ho relatóriu fundu ne’e,” nia tenik.
Implementasaun fundu planu rekuperasaun ekonómika apoiu ba mikro pekena média empreza ne’e bazeia ba rezolusaun Governu númeru 18/2020 10 juñu, kona-ba ‘kria komisaun ba elaborasaun planu rekoperasaun’ liuhosi reuniaun Konsellu Ministru hodi altera dekretu-lei númeru 48/2020, 07 outubru, ne’ebé adota medida apoiu ba família ba atribuisaun cesta bázika no ba operadór ekonómiku lokál sira iha ámbitu planu rekuperasaun ekonómika.
Jornalista : Arminda Fonseca
Editora : Julia Chatarina
