DILI, 26 outubru 2022 (TATOLI)—Embaixada Xina iha Timor-Leste no Agência TradeInveste Timor-Leste hamutuk ho empreza Acelda, kuarta ne’e, ofisialmente reativa fali atividade exportasaun mina kamí orgánika tonelada lima ba merkadu Xina.
“Ita halo reativasaun ba exportasaun mina kamí ba nasaun Xina hamutuk tonelada lima, ba bidon karik hamutuk 25, ho presu $30.000, tuir pedidu hosi Xina,” Diretór empreza Acelda, Lda, Higino da Costa Freitas, hateten ba Agência Tatoli, iha Ajénsia Shiping ANL, Comoro.
Nia dehan, sira-nia parte foin haruka fali ba Xina tanba antes ne’e situasaun COVID-19 halo Xina la simu produtu exportasaun.
Notísia relevante: ACELDA uza produtu lokál 99% ba Cesta Bázika
Ohin foin reativa hodi envolve Ministériu Turizmu Komérsiu no Indústria (MTKI) liuhosi Diresaun Komérsiu Externa, Ministériu Agrikultura no Peska (MAP) liuhosi Diresaun Kuarentena, no TradeInvest nu’udar ajénsia promosaun investimentu exportasaun.
“Atividade reativa exportasaun ne’e ita envolve Governu ho embaixada Xina tanba durante ita halo exportasaun sempre hasoru difikudade iha dokumentu tanba Xina presiza dokumentu barak hanesan tenke iha sertifikadu orijen, orgániku, no sertifikadu material safety data sheet (MSDS), nune’e, ita prepara dokumentu sira haruka ba uluk mak foin haruka tuir produtu ne’e ba,” nia akresenta.
Iha biban hanesan, Diretór promosaun no Exportasaun TradeInvest iha Timor-Leste, Décio Ribeiro, hateten, sira-nia parte ohin partisipa iha atividade ne’e tanba Tradeinvest nu’udar ajénsia promosaun investimentu exportasaun ne’ebé fasilita empreza halo exportasaun ba produtu sira.
“Tradeinveste hanesan ajénsia fasilitadór, nune’e ami ajuda empreza Acelda oinsá mina orgániku kamí ne’e bele di’ak to’o iha merkadu Xina. Produtu sira ne’e ita fasilita liuhosi portu Tibar kona Singapura mak to’o bá merkadu destinadu Xina. Ita-nia planu ba oin TradeInvest nu’udar ajénsia fasilitadór kontinua fasilita ita-nia empreza sira ne’ebé halo exportasaun produtu ba rai-li’ur,” nia dehan.
Nune’e mós, Reprezentante Embaixada Xina iha Timor-Leste, Liz Zhibo, agradese ba Governu Timor-Leste tanba bele servisu hamutuk hodi reativa atividade exportasaun mina orgánika kamí ba merkadu Xina.
“Merkadu Xina durante COVID-19 taka temporáriu no la simu produtu lokál sira hosi li’ur, maibé agora loke fali, Timor-Leste bele exporta produtu ba li’ur,” nia tenik.
Jornalista : Arminda Fonseca
Editora : Julia Chatarina
