Traballadór na’in-lima iha pouzada Maubise seidauk simu sudsídiu liña frente
DILI, 27 outubru 2022 (TATOLI)—Pesoál Seguransa iha Pouzada Maubise, Leonardo Perreira, informa traballadór na’in-lima iha pouszda Maubisse-Ainaro seidauk simu subsídiu liña frente hosi Governu liuhosi Ministériu Saúde.
“Relasiona ho traballadór kona-ba COVID-19 nian, durante fulan tolu (3) iha tinan 2021, ami traballador na’in-lima mak seidauk simu ami-nia direitu ka subsídiu liña frente, maske ami halo ona ami-nia dever. Tanba, durante ne’e ami servisu relasaun ho Ministériu Saúde no empreza ne’ebé servisu iha Pouzada Maubise, maibé to’o agora seidauk hetan ami-nia direitu kona-ba subsídiu COVID-19 nian,” Leonardo Perreira hateten ba Agéncia Tatoli, via telefónika, kinta ne’e.
Tuir nia, iha fulan tolu (3) nia laran traballadór na’in-lima ne’e halo servisu hanesan cleaner hodi hamoos foer, hadi’a kama no seguransa durante oras nia laran iha pouzada Maubise, tanba fatin ne’e uluk sai hanesan fatin izolamentu ba pasiente COVID-19 hosi munisípiu Aileu, Same no Ainaro durante fulan tolu nia laran.
Ho difikuldade ne’e, traballadór hirak ne’e submete ona reklamasaun ba Ministériu Saúde iha Dili no Ainaro, maibé to’o agora seida’uk iha rezultadu.
“Ami hatama ona ami-nia reklamasaun ba Ministériu Saúde Nasionál no Ainaro, maibé sira-nia resposta dehan ami hein de’it maibé to’o agora seidauk iha. Se ita sukat relasaun ho COVID-19 nian, iha parte barak mak Governu selu ona maibé ami-nia mak seidauk hela de’it. Tanba ne’e, ami hakarak reklama ami-nia despaixu ne’e, nune’e haruka ami-nia direitu ne’e mai atu ami bele foti,” nia dehan.
Jornalista : Nelia Fernandes
Editór : Cancio Ximenes
