BOBONARO, 31 outubru 2022 (TATOLI)-Komandante Polísia Nasionál Timor-Leste (PNTL), Munisípiu Bobonaro, Superintendenti Antoninho Mauluta, husu ba motorista transporte públiku ne’ebé movimenta tula pasajeiru iha selebrasaun loron finadu tenke tuir kapasidade karreta nian nune’e bele prevene asidente trafégu.
Komandante ne’e dehan, pasajeiru sira-ne’ebé sa’e karreta ne’e ema, la’ós ‘naha’ tanba ne’e presiza kuidadu sira nune’e labele akontese dezastre ne’ebé ema hotu la espera.
Notísia relevante: Viola kódigu estrada, PNTL Bobonaro halo apreensaun ba motór 21
“Ita ema ne’e mate dala-ida, la’ós mate ohin, aban moris fali, tanba ne’e mak hosi komandu husu ba hotu-hotu atu durante viajen la’o ho kuidadu no mós atensaun, tanba oras ne’e daudaun iha asidente barak, liuliu sira-ne’ebé uza transporte komún, hanesan bís, anguna no karreta sira seluk, no mós sa’e kareta karik tuir fatin ne’ebé ita bele tuur ba, labele tuur iha leten tanba oras ne’e dezastre barak, balu laiha atensaun sira bele kois monu,” Mauluta informa ba jornalista sira, iha kna’ar-fatin, segunda ne’e.
Komandante Mauluta haktuir, iha sesta loron, 28/10 asidente tráfegu akontese tuituir malu iha Balibo ,kareta Pikc-Up ida xoke malu ho baskulante, liutiha ida-ne’e baskulante ho bís diresaun Maliana ba Dili xoke karreta Pick-Up ‘Ranger’ ida iha kruzamentu, mate besik tama ona ba área Batugade nian.
Ne’e duni motorista sira iha obrigasaun bainhira atu viajen karik tenke kontrola uluk kareta ninia kondisaun, hanesan travaun no karreta nia iha kapasidade bele tula pasajeiru no sasán barak ka lae.
“Kondutór sira durante viajen, labele konta istória,blabele halimar iha karreta durante iha viajen nia laran, atu ita labele akontese dazastre ruma, depois ba ita-nia konjak sira tenke kuidadu pasajeiru sira-nia sasán, nune’e labele monu ida dalan no labele lakon, atu nune’e ita hotu hamutuk buat hotu bele la’o ho di’ak,” Komandante ne’e fó hanoin.
Notísia relevante: Tránzitu Bobonaru sei halo auto-stop ba viatura Estadu iha loron finadu
Jornalista: Sérgio da Cruz
Editór: Evaristo Soares Martins
