Top

Kazu Dare, MP alega arguidu na’in-23 ho prizaun preventiva

Arguidu na'in-27 ne'ebé deskonfia envolve iha kazu konfrontu Dare, bainhira ba tuir Primeiru Interrogatóriu iha TDD, tersa (08 novembru 2022). Imajen Tatoli/António Daciparu

DILI, 08 novembru 2022 (TATOLI)— Ministériu Públiku (MP) liuhosi Prokuradór Domingos Barreto, husu ba Tribunál Distritál Dili (TDD) atu aplika medida koasaun prizaun preventiva ba arguidu na’in-23 tanba iha indisiu forte envolve kazu kontrontu ne’ebé hamate Clementino Borges iha aldeia Fatunaba, Suku Dare, postu administrativu Vera-Cruz, Munisípiu Dili.

Iha audénsia primeiru interrogatóriu ne’e, MP alega medida koasaun prizaun preventiva ba arguidu na’in-23, hanesan CCCS, FXTB, NM, LS, RAM, OCN, RSS, SSP, JMCS, ECS, SAR, RVST, ES, HCS, JCB, TAS, CC, MSS, TSL, FD, JMS, FCC, RSR, MZCC, TJM, FAT.

Notísia relevante: Kazu Dare, arguidu 27 submete ba interrogatóriu dahuluk

Arguidu na’in-27 ne’ebé deskonfia envolve iha kazu konfrontu Dare, bainhira ba tuir Primeiru Interogatoriu iha TDD, terasa 8 novembru 2022. Imajen Tatoli/Antonio Daciparu

Enkuantu, Arguidu na’in-haat ho inisiál T, E, C, no H ne’e MP alega medida koasaun aprezentasaun periodika tanba la envolve direta iha konfrontu ne’e.

Kazu ne’e akontese, iha loron 3 fulan-novembru 2022, kalan. Iha akontesimentu ne’e mosu asalta malu entre Grupu Arte Marsiál (GAM) Persaudaraaan Setia Hati Terate (PSHT) no Grupu Arte Rituál (GAR) 77.

Hafoin akontesimentu parte ekipa konjunta konjunta Polisia Nasionál Servisu Investigasaun Kriminál (PNSIK), Serbisu Informasaun Polísia (SIP) J2 Polísia Militár, Servisu Nasionál Intelijénsia (SNI) servisu sekretu sira seluk hanesan Makikit, detein suspeitu ne’ebé envolve kazu ne’e suspeitu hamutuk 27. Hosi suspeitu hirak-ne’e inklui feto ida hodi submete ba prosesu identifikakasaun no investigasaun iha edifísiu PNSIK, Kuartél Jerál, Caicoli, Dili.

Notísia relevante:   Konfrontu iha Fatunaba rezulta joven na’in ida mate

Iha biban hanesan, Defeza arguidu sira solisita ba Tribunál atu aplika medida koasaun aprezentasaun periodika ba sira nia kliente.

Hafoin tribunál rona tiha parte rua, suspende provizóriu prosesu primeiru interrogatóriu ba oras 17:00, lokoraik hodi lee-sai despaixu ikus.

Audénsia ne’e prezide hosi Juis singular, Afonso Carmona, Ministériu Públiku reprezenta hosi Prokuradór Domingos Barreto, no arguidu sira hetan asisténsia legál hosi advogadu nain-haat.

Notísia relevante:  Konfrontu iha Lahane, uma no motór ida hetan estragu

Jornalista: Natalino Costa

Editór       : Florencio Miranda Ximenes

Publisidade

Leave a Reply

Latest Post

error: Content is protected !!