Membru PNTL Bobonaro 26 tuir formasaun teknolojia informasaun
BOBONARO, 08 outubru 2022 (TATOLI)-Membru Polísia Nasionál Timor-Leste (PNTL) munisípiu Bobonaro hamutuk na’in-26 tuir formasaun Teknolojia Informasaun (IT) ne’ebé oferese hosi Komandu Jerál PNTL durante loron lima.
Adjuntu Komandante PNTL munisípiu Bobonaro, Asistente Superintendente Fásio de Jesus Lima, esplika, bazea ba pedidu komandu munisípiu tanba daudaun ne’e sistema hotu iha komandu jerál PNTL adapta ona ba teknolojia mundiál nian, maibée membru balu iha komandu munisípiu Bobonaro sei menus koñesimentu kona-bá informasaun teknolojia sira, liuliu Microshoff Office, Dashboard, Kalohan no Website PNTL nian.
Notísia relevante: Padre Valerio Gusmão fó bensaun ba karreta 14 iha PNTL Bobonaro
“Objetivu hosi atividade ne’e atu aumenta sira-nia kapasidade no koñesimentu, atu nune’e bainhira sira fila-fali ba fatin serbisu, sira bele hala’o sira-nia serbisu ho profisionál liután, liuliu oinsá atu adapta ba sistema insidente jestaun sistema ninian, hodi nune’e bele hatama atividade hotu PNTL nian, atu nune’e ita hotu bele asesu, oinsá atu trasa planu ba iha prevensaun krime ne’ebé akontese iha munisípiu ein- jerál iha Timor-Leste,” nia informa ba jornalista sira, iha Maliana, tersa ne’e.
Formadór ne’ebé fasilta formasaun hahú iha segunda to’o sesta, semana ne’e, mai hosi departamentu (IT) nasionál no atividade ne’e finansia hosi Komandu Jerál Polísia Nasionál Timor-Leste.
Membru hirak-ne’e mai hosi komandu munisípiu Bobonaro, eskudra Atabae, Balibo, Cailaco, Maliana, Bobonaro no Lolotoe.
Notísia relevante: PNTL Bobonaro sei kontrola fogete iha loja no merkadu
Jornalista: Sérgio da Cruz
Editór: Evaristo Soares Martins
