ASL Associates sei dezenvolve planta indústria adubu minerál orgániku iha TL
DILI, 10 novembru 2022 (TATOLI)—Portavós ASL Associates PTY Ltd, Lewis Hunter, hateten kompañia ASL Associates planeas sei dezenvolve planta indústria adubu minerál orgániku ho eskala boot iha Timor-Leste.
“Ami mai kongratula Prezidente Repúblika hafoin manan eleisaun ne’e, hodi haree ba oportunidade balun iha Timor-Leste atu dezenvolve komérsiu indústria adobu minerál orgániku iha Timor-Leste. Iha ona progresu enkontru balun no interresante ba ami-nia kompañia atu investe iha Timor hodi dezenvolve planta indústria adobu minerál orgániku ho eskala boot,” Lewis Hunter hateten ba jornalista sira hafoin hasoru malu ho Xefe Estadu, José Ramos Horta, iha Palásiu Prezidensiál Nicolau Lobato, Bairru Pite Dili, kinta ne’e.
Planu ida-ne’e hanesan kria oportunidade ba kampu traballu nian, tanba kada planta sei fó servisu ba ema 100, nune’e populasaun joven Timor sei sente orgullu.
“Planu ida-ne’e sei apoiu agrikultura lokál, tanba ami sei prodús 250.000 adobu minerál orgániku ba uzu doméstiku no mós ba internasionál. Ohin ne’e, enkontru inisiál no ami sei fila-fali mai iha fulan rua tan, atu hasoru Xefe Estadu hodi diskute kona-ba progresu hosi planu refere,” nia hateten.
Nia dehan, ida-ne’e hanesan sorumutu dahuluk ne’ebé empreza ASL Associates hala’o ho o Xefe Estadu, no ida-ne’e hanesan vizita primeiravez mai Timor-Leste nomos sira hala’o ona enkontru ho departamentu negósiu no finansa hodi haree kona-ba detallu komérsiu nian iha Timor-Leste.
“Ami hetan apoiu hosi Prezidente Repúblika, José Ramos Horta, tanba ho ninia esperiénsia internasionál hanesan hela iha estranjeiru no servisu Governu rai seluk, entaun Xefe Estadu hatudu sinerjia ba saida mak ami atu halo iha Timor-Leste,” nia dehan.
Ho ne’e, Xefe Estadu enkoraja no dehan planu empreza ASL Associates ne’e fó oportunidade ba kampu traballu.
“Xefe Estadu enkoraja ami ho planu ne’e tanba planu ne’e sei fó oportunidade boot ba kampu traballu, komérsiu no esportasaun. Entaun Xefe Estadu motiva ami atu kontinua halo negosiasaun ba planu refere ho ninia apoiu tomak,” nia dehan.
Jornalista : Osoria Marques
Editór : Cancio Ximenes
