iklan

BOBONARO, HEADLINE, MUNISÍPIU, SAÚDE

MS investiga hela kazu tula pasiente ho baskulante iha Bobonaro

MS investiga hela kazu tula pasiente ho baskulante iha Bobonaro

Família sira hatún hela inan isin-rua, Delfina Maia Pacheco hosi karreta laran iha sala maternidade Hospitál Referál Maliana. Imajen Tatoli/Sérgio da Cruz.

BOBONARO, 11 novembru 2022 (TATOLI) – Ekipa gabinete inspesaun Ministériu Saúde (MS) nian, halo hela prosesu investigasaun ba kazu tula pasiente ida hosi aldeia Ozo, suku Lontas, postu administrativu Lolotoe, munisípiu Bobonaro, mai Hostipal Referál Maliana (HRM).

Diretór Servisu Saúde Munisípiu Bobonaro, João Barreto Cardoso, infroma kazu família aluga karreta baskulante tula pasiente, Delfina Maia Pacheco, iha hela prosesu investigasaun.

Notísia relevante: Família aluga baskulante hosi Lontas tula inan isin-rua ba Maliana

“Sira mós halo investigasaun ba to’o sentru saúde Lolotoe, postu saúde Gildapíl, ba parteira no xefe sentru saúde sira, inklui mós ho ha’u. Agora sira sei elabora hela realtóriu ruma, até agora ha’u seidauk hetan relatóriu ne’e,” Diretór Servisu Saúde Munisípiu Bobonaro, João Barreto Cardoso, ko’alia iha Maliana.

Kona-bá atu hola medida ruma ba funsionáriu sira karik komete irregularidade, João dehan sei hein rekomendasaun hosi ekipa gabinete inspesaun MS no ajénsia fiskalalizasaun autoridade munisípiu Bobonaro nian.

Enkuantu kazu ne’ebé akontese iha loron-kuarta,19 fulan-outubru maizumenus tuku 07:00 dadeersan ne’e tanba família tenta kontaktu ba pesoál saúde sira atu mai tula pasiente iha nia rezidénsia, maibé iha momentu ne’ebá la konsege atende ho razaun kondutór ambulánsia númeru mate hela.

“Ita haree relatóriu tama mai, ita harer aktu sira-ne’e loos duni, kontra padraun profisionalizmu ne’ebé maka iha, ita sei toma medida, agora ha’u seidauk hetan kópia relatóriu ne’e maka ami tetu took sansaun no medida prevensaun saida mak ami bele toma,” nia katak.

João haktuir, durante ne’e ekipa diresaun servisu saúde munisípiu Bobonaro sempre  halo supervizaun ba sentru saúde no postu saúde sira-ne’ebé estabelese iha munisípiu Bobonaro.

“Ita fó hanoin malu beibeik, maibé ema barak katak pesoál saúde de’it kuaze 250. Idak-idak mai ho nia jeitu rasik, maski ita iha ona estandarte, enfermeiru tenke halo nusá, parteira tenke halo nusá, médiku no tékniku aliadu tenke halo nusá, maibé nafatin dalabark ita sei hasoru ita-nia kolega balu halo aktu ne’ebé maka sees hosi padraun,” nia akresenta.

Notísia relevante: PDHJ Maliana anota ona kazu tula pasiente ho baskulante

Jornalista   : Sérgio da Cruz

Editór         : Evaristo Soares Martins

iklan
iklan

Leave a Reply

iklan
error: Content is protected !!