Tailándia hakarak dezenvolve modalidade Muathay iha TL

DILI, 14 novembru 2022 (TATOLI)– Governu Tailándia liuhosi nia-Embaxadór iha Timor – Leste, Ekapool Poolpipat, kompromete hakarak dezenvolve modalidade desportiva Muathay iha Timor – Leste tanba joven barak mak envolve ona modalidade ne’e.

Diplomata Tailándia ne’e hato’o informasaun ne’e bainhira realiza sorumutuk ho Sekretáriu Estadu Juventude no Desportu (SEJD), Abrão Saldanha iha Lecidere Dili, segunda ne’e.

“Ohin, ami mai enkontru ho SEJD atu husu ami atu apoia ba modalidade Muathay iha Timor – Leste liuhosi kapasitasaun rekursu umanu fó treinamentu ba treinadór sira, nune’e bele fó treinu atleta sira ho di’ak, nune’e bele partisipa iha atividade internasionál sira”, dehan Embaixadór ne’e.

Modalidade Muathay ne’e hanesan ho modalidade Boxe, maibé Muathay utiliza mós ain iha jogu. Tuir sira nia observasaun Timor – Leste joven barak mak envolve iha modalidade ne’e.

“Muathay tenke dezenvolve iha Timor-Leste Tailándia prontu atu hamutuk ho Governu hodi dezenvolve modalidade ne’e”, nia afirma.

Iha biban hanesan hanesan, SEJD Abrão Saldanha, hateten Governu Timor – Leste prontu servisu hamutuk ho Tailándia hodi dezenvolve modalidade ne’e, maibé agora daudaun sei iha faze diskusaun.

“Embaixadór sei lori treinadór na’in-rua iha dezembru nia-laran sei mai fó asisténsia no treinu ba federasaun iha ne’e no halo demostrasaun ba ema sira ne’ebé gosta arte-marsiál no sira prontu hakarak ajuda mós Timor-Leste atu dezenvolve modalidade ida ne’e atu partisispa iha jogu rejionál no intenasionál sira”, nia afirma.

Tailándia prontu atu asiste iha modalidade ne’e, tanba jogu refere halibur prátikante joven arte marsiál oin-oin hodi bele joga ho téknika ne’ebé sira iha bele joga iha modalidade ida nee.

“Entaun ita hanoin katak ne’e oportunidade di’ak ida atu dezenvolve atu ita nia maluk Foinsae sira ne’ebé gosta Fighting ka tuku malu sira ne’e bele tama iha jogu sira hanesan ne’e,  atu nune’e bele espresa sira nia talentu”, katak nia.

Jornalista: Hortencio Sanchez

Editór      : Florencio Miranda Ximenes