iklan

DILI

Oscar Lima husu Governu kria dekretu-lei regula estranjeiru loke kioske

Oscar Lima husu Governu kria dekretu-lei regula estranjeiru loke kioske

Presidente CCI-TL, Oscar Lima. Imajen TATOLI/Egas Cristóvão

DILI, 17 novembru 2022 (TATOLI)—Prezidente Kámara Komérsiu Indústria Timor-Leste (CCI-TL), Oscar Lima, husu Governu liuhusi Ministériu Turizmu Komérsiu Indústria (MTCI, sigla portugés) kria dekretu-lei ida hodi regula ema hosi rai-li’ur ne’ebé mai loke kioske iha Timor-Leste.

“Ha’u husu ba MTCI se bele Governu kria took kondisaun halo nusa mak atu labele iha kioske Timor-Leste ema rai seluk mak atu ba loke kioske. Tanba ha’u mai hosi kioske faan aimanas, faan modo, maibé momentu ne’ebá halo ne’e ema mai hasai malu ho ami ne’e ladún iha. Ha’u hanoin luta sira nee hotu ne’e, se bele Governu halo netik dekretu lei ruma taka tiha dalan kioske labele fó ba ema liur, maibé fó ba ema rai-laran ne’ebé barak tebe-tebes bele loke,” Prezidente CCI-TL, Oscar Lima. hateten liuhosi nia intervensaun iha IV Kongressu nasionál ho tema “Haforsa setór privadu mais kreativu, produtivu no sustentavel” iha Hotél Novu Turizmu, kinta ne’e.

Nia hateten, kritika setór privadu nasionál hein de’it mak projetu hosi Governu, husu fila fali, se setór privadu nasionál mak la kaer projetu Governu nian husik ba sé mak atu kaer, ema seluk mak atu kaer, deskulpa, maibé osan ne’e halai sai hotu ba li’ur.

Nune’e, Oscar Lima hakarak hato’o ba MTCI se bele ko’alia ho Konsellu Ministru, agora konkursu maske millaun $1 ne’e maior parte ema li’ur ka empreza estranjeiru mak mak kaer.

“Ha’u husu ba ema hotu ne’ebé iha ne’e bele fó ba ema rai-laran, tanba ema barak iha rai-laran komesa iha kapasidade atu bele halo jestaun. Kritika nafatin dehan setór privadu la investe. Ko’alia kona-ba investementu iha rai ida-ne’e, ha’u ho maun Júlio Alvaro mak investidór dahuluk iha Timor-Leste ho osan rihun $500, BNU mak sai sasin,” nia dehan.

Tanba dehan, timoroan la investe maibé agora daudauk investidór ne’ebé hetan ne’e mak timoroan kaer hotu tanba inisiativa hakarak investe iha Timor. Se oportunidade sira-ne’e mak fó ba timoroan, serteza nia mós inisiativa atu investe iha Timor ne’e, mak husi kotuk osan hotu-hotu sai hotu ba li’ur entaun lori saida mak investe.

Oscar Lima dehan, burokrasia agora ne’e aas tebes no sistema pagamentu ne’ebé agora ne’e to’o fulan hitu mak emprezáriu oan sira simu, hanoin bele hamneus ba no ko’alia ho Konsellu Ministru halo nusa mak labele naruk demais no halo avaliasaun ida mai departamentu hateten 50%, ida fali dehan 25%, ne’e ida-ne’ebé mak loos.

Antes ne’e, Prezidente Assosiasaun Komersiál Komunidade Xineza Timoroan (ACCCTO), Katlleen Goncalves hateten, to’o ona tempu TL fó espasu ba investór sira hosi rai-li’ur atu mai investe iha rai-laran.

“Ita atividade negósiu ne’ebé la’o iha rai-laran, kuaze domina tebes ho maluk Xineza sira, no sira prezensa iha ne’e loke loja boboot de’it hodi fó duni servisu ba timoroan sira. Tan ne’e karik kompañia 40 resin atu mai investe iha Timor ne’e oportunidade di’ak, tanba bele fó servisu ba timoroan sira,” nia dehan.

Notísia Relevante: PR Horta husu Governu labele politiza setór privadu

Jornalista : Osória Marques

Editór      : Cancio Ximenes

iklan
iklan

Leave a Reply

iklan
error: Content is protected !!