PR Horta apresia feto Ataúro manán iha kompetisaun kurrida bero

ATAÚRO, 22 novembru 2022 (TATOLI)—Prezidente Republika, José Ramos Horta, apresia tebes ba feto hosi munisípio Ataúro ne’ebe mak sai manan-na’in iha kompetisaun kurrida bero iha festival múzika no kultura 2022 ho lema “Ha’u-nia Illa Ataúro, Ha’u-nia Timor-Leste”.

Notísia Relevante: PR Horta: Ataúro sei sai fatin turístika ba mundu

“Ha’u kontente ho ida-ne’e tanba feto sira mak manán, tanba mane sira baibain ne’e baruk teen mak barak no feto ne’e feto lae tanba badinas. Feto servisu iha uma matenek liu iha eskola,” Prezidente Republika, Jose Ramos Horta, hateten ba jornalista sira iha suku Manumeta Vila, Atauro, tersa ne’e.

Tuir Xefe Estadu. feto Ataúro iha poténsia ba luku tasi, nune’e prezidente sempre apoiu feto Ataúro sira iha ne’ebé de’it.

Hafoin kompetisaun, Xefe Estado entrega premiu ba manán-na’in kompetisaun kurrida bero ne’ebé kompostu husi feto no mane, ne’ebe partisipa hosi munisipio Dili, Liquica, Manatuto no Ataúro.

Molok atu hahú kompetisaun, Prezidente Repúblika ne’ebe  akompañadu hosi Xefe Governu Taur Matan Ruak, Embaixadór Indonézia, Okto Dorinus no Governante sira halo abertura hodi hala’o aktividade kurrida bero refere.

“Iha kompetisaun ne’e ha’u apoiu liu ba feto, ida-ne’e de’it,” Horta hateten iha abertura kompetisaun kurida bero iha suku Beloi-Ataúro.

Manán-Na’in dahuluk, Arão Mateus, sente orgullu nu’udar Ataúro oan, hosi suku Bikeli bele manán premiu ho osan montante $800.

“Desportu ida-ne’e ami sente kontente tanba ohin loron ha’u akompañ, ha’u-nia elementu hamutuk na’in-hitu, to’o duni rezultadu finál simu osan ho montante $800,” nia dehan.

Aleinde ne’e feto manán-na’in hosi grupu Kokopata hosi suku BikeliAtaúro ne’e sente kontente tanba nu’udar feto bele manán iha mos kompetisaun ne’e.

“Se tinan oin mak atividade ne’e akontese nafatin iha munisípiu Ataúro, ha’u prontu tuir nafatin,” nia dehan.

Jornalista : Mirandolina Barros Soares

Editor       : Cancio Ximenes