iklan

JUSTISA, DILI

PTR atualiza preparativu harii Supremu Tribunál Justisa ba PR

PTR atualiza preparativu harii Supremu Tribunál Justisa ba PR

Prezidente Tribunál Rekursu, Deolindo dos Santos. Imajen Tatoli /Egas Cristovão.

DILI, 25 novembru 2023 (TATOLI)—Prezidente Tribunál Rekursu (PTR), Deolindo dos Santos, atualiza preparativu atu harii Tribunál Supremu Justisa (STJ) ba Prezidente Repúblika (PR).

Notísia Relevante: Julgamentu Tribunál Movél suspende no sei funsiona iha tinan oin

“Informa ba Prezidente Repúblika saida mak halo atu fó resposta lei (Organizasaun Judisiáriu) ne’ebé mak foin Parlamentu Nasionál aprova atu harii Tribunál Supremu ne’e parte ami-nian maizumenus la’o oinsa,” PTR relata ba jornalista sira hafoin ramata enkontru ho Xefe Estadu iha  Palásiu Prezidensiál Nicolau Lobato, Bairru Pite, sesta ne’e.

Iha esforsu balun ne’ebé atu halo preparasaun ba infraestrutura ne’e iha orsamentu ba 2022 nian implementa hodi halo dezeñu ba Tribunál primeiru instansia sira no Supremu Tribunál Justisa rasik tuir lei foun Organizasaun Judisiáriu ne’ebé agora la’o hela espera tinan ne’e bele hotu.

“Orsamentu tinan ne’e ita prepara infraestrutura halo dezeñu ho tipu ida de’it ba Tribunál primeira instánsia 13 eseptu Ataúro konkursu la’o tiha ona, ohin komesa diskusaun atu halo dezeñu ne’e rasik,” nia informa.

Ba STJ agora konkursu la’o hela tanba orsamentu boot husu apoiu Komisaun Nasionál Aprovizionamentu (CNA, siglá portugés), inklui dezeñu ba rezidénsia juiz no tinan oin  hanoin  halo previzaun orsamentu edifísiu Tribunál Rekursu rasik.

“Ba Supremu Tribunál Justisa kuandu konkursu lansamentu ba dezeñu tinan ne’e no inisíu tinan oin, ita mós bele avansa kedas ho konstrusaun ho nesesidade lei ne’ebé Parlamentu aprova tanba orsamentu ne’e rasik la sala millaun $9 aprova tiha ona iha Parlamentu, tinan balun nia laran tiha ona,” nia dehan.

Ba parte rekursu umanu nian iha mós formasaun ba ema-ne’ebé serbisu iha Tribunál hotu komesa hosi funsionáriu, ofisiál justisa no juiz sira-ne’ebé tuir hela formasaun inisiál ho kontinua ba tinan ne’e iha Portugál ba juis na’in-neen hotu ona no na’in-lima tuir hela.

PTR atualiza mós ba PR kona-ba diploma sira-ne’ebé iha hela diskusaun iha Parlamentu Nasionál (PN) hodi fo mós resposta ne’ebé lais ba hanoin ne’ebé PN iha, hodi harii Supremu Tribunál Justisa ho Tribunál Rekursu rasik.

Tanba bainhira harii Tribunál ona hanesan atualmente iha Tribunál rua no se hanoin harii Tribunál instánsia tolu, nia regra prosesuál mós sei iha mudansa liu-liu kódiku prosesu penál no sivíl hosi nível instánsia rua ba tolu.

PTR relata serbisu Tribunál ba Xefe Estadu

Aleinde ne’e, Prezidente Tribunál Rekursu (PTR), Deolindo dos Santos, sesta ne’e, hasoru malu ho Xefe Estadu hodi relata serbisu Tribunál nian.

“Ohin, hasoru malu ho Prezidente Repúblika hodi atualiza setór justisa nian liliu Tribunál nian la’o oinsa to’o ohin loron besik fin do ano saida mak ami halo ona.” PTR hateten.

Normalmente serbisu Tribunál la’o di’ak ba Tribunál hotu prosesu hotu la’o normál mezmu la sees hosi difikuldade ne’ebé mak iha tenta atu fó solusaun.

Entaun iha prosesu ne’e Tribunál balun la’o di’ak mak Baucau, Oé-Cusse, Dili maibé sorin seluk Suai tanba iha prosesu kazu krime númeru aumenta makaas no sivíl tun makaas.

“Iha Baucau la’o ho forma moderadu mantein sei di’ak nafatin, iha Suai sa’e uituan krime nian no mós Oé-Cusse hanesan,” nia dehan.

Ba Tribunál Rekursu prosesu la’o normál laiha akumulasaun kazu pendente ruma.

PTR la esplika detallu kona-ba númeru kazu totál hira mak rejista no hira mak finaliza prosesu no pendente ho tipu kazu hosi janeiru-novembru tinan ne’e tanba la fiksa maibé jeralmente prosesu hotu lao di’ak.

Jornalista : Nelson de Sousa

Editór        : Cancio Ximenes

 

iklan
iklan

Leave a Reply

iklan
error: Content is protected !!