iklan

EKONOMIA, HEADLINE

SEA simu proposta 91 hosi grupu agrikultór atu kuda ai protesaun kafé

SEA simu proposta 91 hosi grupu agrikultór atu kuda ai protesaun kafé

Plantasaun Kafé iha munsípiu Ainaro, domingu (15/05). Imajen Tatoli/Francisco Sony

DILI, 25 novembru 2022 (TATOLI)–Sekretaria Estadu Ambiente (SEA) liuhosi Diresaun Nasionál Biodiversidade (DNB) simu ona proposta 91 hosi grupu agrikultór sira atu kuda ai-parapa no ai-protesaun ba kafé iha munisípiu sira.

“Ami fó sai ba públiku oinsá sira hatama proposta kona-ba plantasaun, nune’e ami simu proposta 91 hosi grupu agrikutór sira hosi munisípiu la inklui Ataúro no Rejiaun Administrativa Espesiál Oé-cusse Ambeno,” Diretór Nasionál Biodiversidade, Rui Pires, informa ba Agência Tatoli, iha Bebora, sesta ne’e.

Nia dehan, grupu agrikultór sira ne’ebé hatama proposta sei halo realibilitasaun ai-protesaun ba kafé sira ne’ebé tuan ona hodi nune’e bele hasa’e ninia produsaun.

“Parte diresaun sei halo avaliasaun ba proposta sira hodi hatene ai-horis protesaun ba kafé no ai parapa hira mak grupu agrikultór sira presiza, maibé daudaun ai-horis ne’ebé prepara ne’e kada ai-hun ho kustu $0,50,” nia akresenta.

Notísia relevante: Governu aprova programa estimula renovasaun no espansaun plantasaun kafé

Viveiru no ai-parara sira ne’ebé grupu agrikultór sira presiza kada munisípiu iha hotu.

“Ita simu proposta iha grupu rua mak sei halo plantasaun ai-parapa, ezemplu konservasaun flora no fauna (CFF, sigla portugés) iha Hera no Ulmera,” Rui dehan.

Grupu agrikultór Ulmera rasik sei kuda ai-parapa 1.000 no CFF kuda 42.000, ne’ebé prosesu kuda ne’e sei hahú iha tinan ida-ne’e.

Kustu atu kuda ai-protesaun ba kafé no ai-parapa ne’e rasik hamutuk millaun $1,5.

Antes ne’e, SEA no Ministériu Agrikultura no Peska (MAP) asina akordu hodi halo reabilitasaun no expansaun ba kafé iha munisípiu Aileu, Bobonaro, Ermera, Liquiçá no Manufahi.

Iha akordu ne’e, orsamentu ba programa renovasaun ba plantasaun kafé no ai-protesaun hamutuk millaun $6,4, ne’ebé hosi orsamentu ne’e SEA sei ezekuta 37% hodi halo deskarboniza barak iha área halo plantasaun no MAP sei ezekuta 63% .

Jornalista    : Arminda Fonseca

Editora         : Julia Chatarina

iklan
iklan

Leave a Reply

iklan
error: Content is protected !!