iklan

BOBONARO, MUNISÍPIU

Veteranu Faustino: “Rekoñesimentu ne’e hametin espíritu lori povu ba moris di’ak”

Veteranu Faustino: “Rekoñesimentu ne’e hametin espíritu lori povu ba moris di’ak”

Veteranu, Faustino da Costa, simu medalla kondekorasaun ne'ebé entrega hosi Prezidente Autoridade Munisípiu Bobonaro, Ernesto de Oliveira Barreto. Imajen Tatoli/Sérgio da Cruz.

BOBONARO, 28 novembru 2022 (TATOLI)—Prezidente Repúblika, José Ramos Horta, segunda ne’e, kondekora veteranu na’in-50 iha munisípiu Bobonaro ho kategoria Ordem Gerrilia no Ordem Nicolau Lobato ne’ebé kompostu hosi Grau III partisipasaun 15-19 na’in-ualu (8), Grau III partisipasaun 8-14 na’in-40 no Grau II partisipasaun 15-19 na’in-rua (2).

Notísia Relevante: CCLN identifika kombatente 50 hosi Bobonaro sei simu kondekorasaun iha Manauto

Veteranu Faustino da Costa hato’o agradesimentu no sente orgullu tanba hafoin tinan 47 proklamsaun independénsia no tinan 20 restauransaun independénsia, Estádu bele rekoñese ona sira-nia partisipasaun iha prosesu luta naruk iha ai-laran no villa hodi konkista libertasaun nasionál.

Idependénsia nasionál ne’e klaru katak mai hosi kontribuisaun veteranu sira-nian, maibé liuhosi partisipasaun másimu hosi povu mak ohin loron luta-na’in sira bele hetan oportunidade simu rekoñesimentu hosi Estádu.

“Ha’u nia esperansa katak ho rekoñesimentu medalla ida-ne’e atu hametin liután espíritu rezisténsia, atu oinsá kontinua ho prosesu dezenvolvimentu la’ós tuir ona kontestu tempu uluk ninian maibé espíritu rezisténsia tempu ida agora nian. Espíritu ne’e mak oinsá atu reziste hasoru baruk-teen, matan dukur, hasoru servisu ne’ebé lahó responsabilidade, nune’e bele hatán povu ninia espetativa hodi lori sira ba hakbesik moris di’ak tuir valór sira-ne’ebé mak ita-nia eroi sira hosik hela durante tempu rezisténsia nia laran,” nia hateten ba ba jornalista sira iha ámbitu komemorasaun loron prokolamasaun independénsia 28 novembru ba dala-47, iha kampu Futeból Maliana.

Iha biban ne’e, Atuál Prezidente Komisaun Funsaun Públika (KFP) ne’e mós espera katak Estádu sei kontinua fó valorizasaun ba veteranu sira-ne’ebé to’o oras ne’e seidauk hetan opotunidade tanba kestaun meiu no kondisaun.

“Ha’u-nia hanoin mak ne’e, maluk veteranu, kombatente ba luta libertasaun nasionál nian, ita husu atu bele servisu hamutuk ho entidade relevante sira hato’o imformasaun sira-ne’ebé loloos,  hodi nune’e ikus mai Estadu kria kondisaun ho meiu sira oinsá ita-boot sira hetan atribuisaun medalla nu’udar rekoñesimentu ba sira ida-idak nia partisipasaun ba prosesu luta libertasaun pátria,” nia dehan.

Ministru Ensinu Superiór Siénsia no Kultura (MESSK), Longuinhos dos Santos, hateten veteranu sira-ne’ebé hetan kondekorasaun liuhosi prosesu rekollamentu dadus ne’ebé naruk no rigorozu tebe-tebes to’o ikus identifikadu ho kategoria bazea ba sira-nia partisipasaun luta.

“Ida-ne’e hatudu katak atu fó valór ba Independensia ida ne’e katak ema ne’e loos duni dedika nia-an ba rai doben Timor-Leste iha funu naruk nia laran, ne’ebé ohin ita haree Bobonaro-oan lubuk ida mós simu medulla,” nia hateten.

Tuir Nota imprensa ne’ebé Agência Tatoli asesu katak, kondekorasaun grau kolár orden Timor-Leste ne’e bazea ba dekretu Prezidente Repúblika nú. 9/2022.

Nune’e mós iha Konstituisaun Repúblika Demokrátika Timor-Leste (K-RDTL) prevista iha ártigu 11, fó valór ba Rezisténsia, iha alinea primeiru kona-bá Repúblika Demokrátika Timór-Leste rekoñese no fó valór ba povu Maubere nia rezisténsia tinan atus ba atus hasoru dominasaun hosi rai-liur no mós ba sira hotu ne’ebé fó kontribuisaun hodi luta ba independénsia nasionál.

Iha sorin seluk, lei nú. 3/2006, 12 abríl, kona-bá estatutu Kombatente Libertasaun Nasionál, altera ho Lei nú.9/2009, 29/2009, no 29 juñu no Lei nú.2/2011, 23 marsu, hodi reafirma kompromisu Estadu no sentidu hodi rekoñese no valoriza esforsu manifestasaun ba Kombatente Libertasaun Nasionál no omenajen mártir sira-nia luta ba independénsia nasionál.

Kondekorasaun ne’e ho baze K-RDTL artigu 58 iha alinea J, konjugadu ho artigu 32 ba estatutu Kombatente Libertasaun Nasionál, ne’ebé aprova hosi Prezidente Repúblika, kona-bá proposta hosi Konsellu Kombatente Libertasaun Nasionál ne’ebé dekreta ona katak;

Primeiru, atribui kondekorasaun orden gerilla ba ema na’in-39, daruak, atribui kondekorasaun orden FALINTIL ema na’in-tolu, datoluk atribui kondekorasaun Orden Nicolau Lobato ema na’in-455.

Notísia Relevante: PR Horta kondekora timoroan na’in-22 no estranjeiru na’in-haat

Jornalista : Sérgio da Cruz

Editór       : Cancio Ximenes

iklan
iklan

Leave a Reply

iklan
error: Content is protected !!