MEJD sei hahú sensu eskola 2022 iha territóriu nasionál
DILI, 29 novembru 2022 (TATOLI)—Ministériu Edukasaun Juventude no Desportu (MEJD) sei hala’o atividade sensu eskola 2022 iha territóriu nasionál hodi hetan dadus atu sai matadalan hodi prepara planu di’ak ba eskola sira iha futuru.
Diretór Jerál Administrasaun no Jestaun Finansa hosi MEJD, Antoninho Pires, hateten, atividade ne’e hetan apoiu hosi Diresaun Jerál Estatístika (DGE, sigla portugés) hosi Ministériu Finansa (MF) liuhosi kooperasaun ne’ebé halo ona iha fulan hirak liu ba kotuk.
“Ema hamutuk 158 kompostu hosi enumeradór 79 no enjeñeiru 79 sei realiza sensu eskola, ho objetivu atu haforsa ami-nia dadus iha ministériu kona-ba Education Management Information System (EMIS), atu nune’e bele sai hanesan matadalan ida hodi bele apoiu ami atubele halo planu reabilitasaun no konstrusaun eskola liuhosi projetu Basic Education Strengthening and Transformation (BEST),” Diretór hateten ba Agência Tatoli, iha salaun Ian Martin Instituto Nacional de Formação de Docentes e Profissionais da Educação de Timor-Leste (INFORDEPE), Balide, tersa ne’e.
Notísia relevante: BELUN no IBTCI sei halo sensu eskolár ba ESGTV iha TL
Atividade sensu ne’e sei hala’o ba eskola sira hahú hosi edukasaun pré-eskolár to’o eskola ensinu sekundáriu jerál no tékniku vokasionál ne’ebé hetan ona identifikasaun hosi MEJD.
“Enumeradór no enjeñeiru 158 ne’ebé Diresaun Jerál Estatístika prepara ona sei hala’o de’it saida maka ministériu planeia ona,” nia akresenta.
Sensu eskola ne’ebé sei rekolla kompostu hosi edukasaun pré-eskolár 25%, ensinu báziku 100% no ensinu sekundáriu jerál no tékniku vokasionál 30%. Daudaun dadus atu foti iha eskola sira inklui totál númeru estudante, manorin, edifísiu, dadus rai no dadus seluk tan.
Entidade ne’ebé sei realiza programa ne’e daudaun hahú ona formasaun durante loron-rua no tuir planu sira sei hahú serbisu durante fulan-ida, hahú loron 01 dezembru 2022 to’o ramata.
Iha sorin seluk, Tékniku Asistente ba Sensu Eskola hosi Word Bank, Domingos Gomes, konsidera atividade sensu eskola importante no iha duni vantajen atu ministériu bele foti desizaun hodi projeta planu ba futuru hodi harii eskola sira bazeia ba dezenvolvimentu ohin loron.
“Signifika ministériu bele garante edukasaun ida ho kualidade ba ema hotu. Tanba ne’e tuir dadus ne’ebé DGE simu ona hosi MEJD, hatudu katak totál eskola iha territóriu nasionál konta hosi pré-eskolár to’o ensinu sekundáriu jerál tékniku vokasionál hamutuk 1.481, kompostu hosi tékniku vokasionál 42, ensinu sekundáriu jerál 55 no eskola ensinu báziku no pré-eskolár mak barak liu,” nia dehan.
Jornalista : Tomé Amado
Editora : Julia Chatarina
