DILI, 02 dezembru 2022 (TATOLI)—Diretór Ezekutivu Asosiasaun Defisiénsia Timor-Leste (ADTL), Cesário da Silva, hateten ADTL konsidera Governu seidauk iha atendimentu justu no inkluzivu ba Ema ho Defisiénsia (EhD) iha Timor-Leste.
Notísia Relevante: Governu Austrália kompromete apoiu Ema ho Defisiénsia iha Timor-Leste
“Atendimentu sira ba ema ho defisiénsia, ami konsidera atendimentu ida-ne’ebé seidauk justu no seidauk inkluzivu liu-liu meiu komunikasaun no fasilidade asesu sira, nune’e fasilidade asesu sira mós implikasaun boot ba ema ho defisiénsia,” Cesário da Silva hateten ba jornalista sira iha ámbitu Sosializasaun no Konsulta Saúde Públika ba ema ho defisiénsia, iha Palásiu Prezidensiál Nicolau Lobato, Bairru Píte, sesta ne’e.
Aliende ne’e, nia dehan, atendimentu públiku ba ema ho defisiensia agora menus tebe-tebes liu-liu seidauk sensivél ba ema ho defisiénsia, tanba ne’e ADTL nafatin enkoraja governante no instituisaun públiku sira hotu atu halo atendimentu ida-ne’ebé dignu ba ema ho defisiénsia.
Nia hateten, asesibilidade sira-ne’ebé iha Timor-Leste la dignu ba ema ho defisiénsia sira atu asesu, tanba kria ona bareira ba ema ho defisiénsia atu hola parte, hanesan iha sentru saúde nian la asesu ba ema ho defisiénsia entaun ema ho defisiénsia labele ba halo konsulta, hanesan kadeira roda labele ba halo konsulta no maluk sira problema tilun ba konsulta se mak bele akompaña.
Aliende ne’e, nia mós preukupa kona-ba espasu sira ba ema ho defisiénsia atu asesu, tanba Governu aprova ona dekretu-lei, maibé laiha implementasaun.
“Kona-ba espasu, ita mós horisehik iha sesaun ida hodi komunika Ministru Obra Públika atu haree no asegura ninia implementasaun, tanba espasu iha relasaun ho espasu asesu sira Ministériu Obra Públika iha dekretu. Maibé ami-nia preokupasaun mak implementasaun tanba dekretu ne’e la tau ba seriedade atu implementa, entaun situasaun ida-ne’e mak problema boot liu iha ita-nia kontestu,” nia dehan.
Komemorasaun loron mundiál ba ema ho defisiénsia ba dala-30 ne’e, ADTL komemora ho atividade hanesan halo sesibilizasaun no atendimentu públiku ba ema ho defisiénsia, hosi ne’e konvida instituisaun relevante sira atu fahe informasaun atu ema ho defisiensia bele hatene.
Ministériu Saúde ne’ebé mai fahe informasaun kona-ba asesu saúde nian no Sentru Nasionál Reabilitasaun fahe informasaun kona-ba asesu ba ekipamentus sira ba ema ho defisiénsia, STAE fahe mós informasaun asesu ba kartaun eleitorál no Fó Naroman Timor-Leste fahe informasaun kona-ba asuntu saúde matan nian, liuliu prevensaun ba matan no atu asegura matan.
Nune’e mós, iha sesaun konsulta públiku ne’ebé médiku sira mai inklui parte naroman hosi Timor-Leste sei konsulta ba matan liu-liu koko matan no konsulta matan no konsulta saúde públiku no mós parte Sentru Nasionál Reabilitasaun (CNR) sira mós halo atividade demostrasaun ba ekipamentu sira-ne’ebé nesesáriu ba ema ho defiénsia, hanesan ai-tonka, ain falsu no sira seluk ne’ebé mak relasaun ho ema ho defisiénsia sira.
Jornalista : Nelia Fernandes
Editór : Cancio Ximenes
