iklan

DESPORTU, BOBONARO, HEADLINE, MUNISÍPIU

FATL laiha orsamentu sufisiente realiza kampeonatu rejionál

FATL laiha orsamentu sufisiente realiza kampeonatu rejionál

Prezidente Federasaun Atletizmu Timor-Leste, Afranio Xavier. Imajen Tatoli/Sérgio da Cruz.

BOBONARO, 05 dezembru 2022 (TATOLI) – Prezidente Federasaun Atletizmu Timor-leste (FATL), Afranio Xavier, fó-sai katak federasaun laiha orsamentu sufisiente atu realiza kampeonatu rejonál no nivél munisipál ba époka 2022.

Afranio hatutan, FATL mós iha kalendáriu nasionál no festivál nasionál desportu ne’ebé federasaun hamutuk Sekretaria Estadu Juventude no Desportu (SEJD) realiza tinan rua dala-ida no kampeonatu ba atletizmu tinan ida realiza dala-ida, nune’e atu ta’es atleta sira-nia prestasaun hodi ba partisipa iha jogu internasionál.

Notísia relevante: SEJD hili Stadium Café Gleno sai sentru treinamentu ba Atletismu

“Maibé até agora, ita seidauk iha orsamentu sufisiente atu aloka ba kampeonatu rejionál nível munisipál ne’ebé mak tenke mai hosi postu sira. Ida-ne’e seidauk akontese,” nia informa ba jornalista sira, iha Jináziu Maliana, segunda ne’e.

Maske nune’e, Prezidente Federasaun ne’e espera governu tuir mai bele aloka orsamentu ba modalidade atletizmu hodi estabelese asosiasaun iha munisípiu sira.

“Antes sira atu partisipa iha kampeonatu nasionál, sira tenke partisipa iha jogu rejionál nível munisipál atu deside ranking no halo apuramentu iha-ne’e, kuandu prestasaun ladi’ak labele ba, prestasaun di’ak mak lori ba,” nia tenik.

Maibé iha tinan ne’e governu kontinua tau prioridade ba modalidade individuál ne’e atu promove iha nível nasionál no hahú fihir tán iha nível munisípiu tanba tinan ne’e  SEJD aloka orsamentu rihun $50 hodi imveste iha rekursu umanu, liuhosi formasau bázika ba treinadór no arbitrajen kada munisípiu ema na’in-30, komposta hosi arbitrajen na’in-10 no treinadór na’in-20.

Durante ne’e atleta hosi modalidade atletizmu konsege partisipa iha eventu rejionál Sea Games, kontinentál ASEAN Games, Word Campionships no jogu olímpiku.

“Atletizmu nunka absénsia iha jogu olímpiku ne’ebé realiza komesa hosi partisipasaun ita-nia iha Sidney, Atena, Beijing, Brazil, Tokyo no 2024 sei akontese iha Fransa no atletizmu mós iha prioridade atu partisipa,” nia katak.

Nune’e mós ASEAN Games ne’ebé partisipa hosi nasaun hamutuk 45, tuir fali mai iha sudeste aziátiku no programa ne’e fiksu ona iha kalendariu kada tinan.

Notísia relevante: FATL-Cuba realiza formasaun atletizmu ba ema na’in-30 iha Bobonaro

Jornalista   : Sérgio da Cruz

Editór         : Evaristo Soares Martins

iklan
iklan

Leave a Reply

iklan
error: Content is protected !!